गोदो आबै-आबौ दंब्ला
सोरगिदिँ बारि गंसे
फिथाइ-सामथाइ गोजाथारमोन,
जानो हानाय जाना
जानो हायैखौ गारना
जोबोद खुसि मोनथारोमोन आं।
नाथाय दा गैलिया आफानि आमोलाव,
थालिर बिफां मोदोमफ्रु फिथाइ
रैमालि नारेँ कमला जाबथु
लेरख' जल'पि थाइसुरि
खान्थाल लिसु बायदि नारेँ।
बोथोरखौ दाय हमाब्ला
रावहाबो राहा गैया,
आफायाबो बोथोरखौ दाय होदोँ।
बोथोरा गोरान खालि गोरानल'
गोदोनि बर' गामिया दा-
बेखायनो गैलिया;
गय फाथै रानज्रिँलांबाय (सेंबाय)
सिजौ थुलुंसिफोरा बहा थावरिबावनो?
दुब्रि जाथ्रासि बिलाइफोराबो
सोरनिबा खंगि-खंगा आखायनि दैजोँ
खुनुरुखुमसो थांनानै दं।
दा आफाया आथिँ हेबग्रा जाबाय,
बोथिसे जानायनि थाखाय
जुंगाल जुरिना नांगोल दैनानै,
हाल हगारना आथिँ सुनानै,
बोथिसे मोनजाबानो गोजोनग्रा जाबाय।
जेसेनो आफानि सिलाखौ नायो-
आं गोजामखौ गोसो खाङो-
आबै-आबौनि आगानखौ नुनायबादि मोनो।
ग्रोम ग्रोम आबौनि बारिया,
जाहाब मोदोमफ्रु मैगं फिथाइनि बारिया,
गोरान दिनै आफानि बारि।
नाथाय- -
गैया गैया होनब्लाबो
दा आं नुयो फांसे सुमफ्राम बिफां,
जारौ जारौ गोमोन गोमोन फिथाइ,
दा बेयाव आं नुयो-
उन्दै गिदिर बायदि दाउसिननि-
गोसो होना मोसालायनाय,
मिनि खुसि आदार दौलायनाय,
रैसुमै गारां देँखो हगारनाय।
आं नायो सानफ्रामबो नुयो,
आं गोजोन्नाय मोनो,
बिसोरजोँ मोसाफानो-
जोबोद गोसो जायो।
नाथाय- -
आंहा अनसुलि गोरबो थासेयावबो
बिसोरो आंखौ गिना बिरलाङो-
आं दुखु मोनखाङो!
(उन्दै समाव) जाय बिफांखौ
आं आफाजोँ गायदोँमोन
बे बिफांखौ आं गोसोखाङो-
बे बिफांनि गोमोन फिथाइ
दाउसिन दाउलाया खेबख्लाबना जानाय नुब्ला,
आं गोजोन्नाय मोनो नायै नायै।
This poem has not been translated into any other language yet.
I would like to translate this poem