मुलुगाव दुखुथिया आंल' नङा Poem by Ronjoy Brahma

आंनो साबसिन आंनो समायनासिन
आंनो रोँसिन आंनो अनजालुसिन
अब्लाबो आयआ आंखौल' मानो अना?
आंनो मावथिसिन आंनो गुणिसिन
आंनो बाखोनायथावसिन आंनो मददगिरिसिन
थेवबो आफाया आंखौल' मानो अना?
सानखौ आंल' खुलुमो
बिसोर रावबो खुलुमा,
अब्लाबो सोरांखौ आंनोल' मानो होआ?
खोमसिखौ आं लुबैयाखै
थेवबो खोमसिखौ मानो हरो, सोर?
आं सानफ्रामनो दुखुआव गोग्लैयो
रंजानाय फैयो सम समल'
जेब्ला सिरिसे स्राय बारा मोसाग्लां फैयो,
जेब्ला अखाया दान्दिसे रंजाग्लाय फैयो,
बेबादिनो बैसोनि 365 साना गिदिँगासिनो थायो।
अ' नंगौ नंगौ, सैथो नामा-
(हरबादि खोमसि) कमल ब्रह्मआ लिरदोँ
' नोँ बिमानि गोसोखौ हमनो हाया।
बयबो आंनि फिसा!
बयखौबो आंनो जोनोम होदोँ।
आंनि बिखायाव बयबो फिसायानो समान।'
दुखुखौ आं नागिरबाय
सेक्सपीयेरनि सायनासालियाव,
देरहानायखौबो आं नागिरबाय
घरनिघर औवारीनि मुस्रि सिङाव,
थेवबो थेवबो आं दाबो-
बर'लेण्डनि बेमा जे गांसेयाव
दिन्दां जानानै थाबाय थाबाय।
गाबनायनि हांमाया बेसे गोथौ
अदेबानि मोदैनि थरथिँआ बेसे गोथार
जिरि जिरि गोरबोनि दुखुआ बेसे गोगो
बिजिर बिजिर आं गावनो बुजिदोँ
मुलुगाव दुखुथिया आंल' नङा!
अदेबानि गाबनानै आं रावखौबो फेजेन हाया
रावनिबो आं गाहायसिन जानोबो हाया।