अमास्रोननि दाहा Poem by Ronjoy Brahma

आं जोहोलाव नंगौ ना नङा
आं मिथिया
नाथाय-
आं नंगौ मावथि मावथि
-
फुंआव बिसोर जानाय आदार लाबोनाय सिगां
आर'नाय खानानै
गामसा सारामाय खिथेबनानै
हालेवो आं लानजाइ सिबै सिबै
-
नाथाय-
गाबनो गोनां जायो आं
आंनि लानजाइ सोमाव सोमाव
गोसो होना हालेवनायावबो
हासार जाया लायनो...!
-
जानांगौ जानायावनो जायो आं
लाव लाव दै लगायनाय गुन्दै
समाव गोब्रा मन'नो हाख'यै
आयजं मायसालिनि जुजाय खर'
-
उदै बुङाब्ला उदै सुफुंनो
मोन्नायमानि जायो आं
हारा-मुरा रोदा-रुदा
थांनानै थानो मिजिँ लानानै
-
एखमबा जानो जेबो मोना जायो
गांसो बेन्दोँ-बेनला
लोथो फेनाय आंगायल'ल'
जुजु बोयो आं उदै बुंजासे अफ्रिखौबो
बिसोर जानो जुदि होफैयो
-
नाथाय बिसोर लाजिया
बिसोरो आंनि जाम्बाथिखौ
गले गले रायखाङो
आंनि मावथि आखुखौ रायखाङा
-
बिसोर जेखौ होयो
आं बेखौनो जायो
बेनो आंनि घोरोम
बेबो आंनि मावनां
-
बिसोर आंखौ नेवसियो नाथाय-
नाथाय बिसोर बाखोनाया
आंनि सहायनो हानाय गुणखौ
-
आं दुखु मोनो
बे दुखुखौ होखारनो
गोदो उन्दुयो आं
रावबो खोनायै बादिनो हां लायो।