थिखिनिफ्राय ओँखारबोनानै Poem by Ronjoy Brahma

बन्दरनि लामाजोँ सान्दुं थिखा-थिखि
मेगनाव ससमा लानानै
गोसोआव खावब्ला-सिब्ला सांग्रेमा
-
रावखौबो गिया बियो दिनै
फिनज्राब फिनज्राब बारनो हागौ
मिनि बास नाइल' ट्राक
अट' रिक्सा 108 खौबो
नाथाय आंगो होनना फोनहाय होनो
बेहा लाइजाम गांसेबो गैया
-
समायना समायना हाजोखौ अहाबाय
फुवा फुवा निजोरानि दैयावबो आंगायबाय
बियो दा शहरनि ड्रेनाव दुगैगोन
द'थाला बिल्दीँ गाखोनानै
(हाजोनि गथ' हायेननि बन्थ' होन्नायबादि)
-
आखायाव हाद्रि नांगोन
मानोना शहरनि लामाया हाद्रि
स्लिम स्लिम फाखानि मालाय मा जानो?
जालायाव थ्रोब फारनैखौबो
-
हाजोआ गाबहरदोँ
सोमो गोनां साना खावब्ला नायहरदोँ
आज्लंनायनिफ्राय आज्लंसिनदोँ
मेगननि मुसुगुर बोखो बोखो
आरोबाव माखासेया खौरां मोनस्लाबाखिसै
बिसोरबो गाबनो हागौ खोनाब्ला
-
दिनै बियो सोरां नुनाय लामायावबो
न'नि दानदालियाव सौदावनायबादि
थुखिनि अन्थाइ जोथ्रोदफ्लाङो
दाउखा बारियाव गोग्लैहैयो
जायखौ गावबो मिथिया रावबो नुवा
(सिमांआव सिगुन राजाजोँ बिसिगि जानायबादि) ।