गोजां बोथोरनि सल' (जोँ गामिनि) Poem by Ronjoy Brahma

गोजां बोथोरा फैलायबाय गुरब्लानो
रांखोआ जाथारलायबाय जारलासो
मा खालामनो संसार होनबा संसार
-
माहाजोन माहाजोनफ्रा रंजादोँ
गुदुं गुदुं उन्दुनो मोनगोननि
हरफा इलेकट्रिक फांखा फिदिँना
गोरिब जाथारनोसैमोन सिबायफ्रा
-
मैया फाथो बानगासे लांबाय
दिनैबो दाउजो गिन्द्रिखौ लांबाय
थेवब्लाबो बाहागानो जाथाराखिसै
खर' खुर खाफाल हम जेबो जाया
बेनोथार संसार बेनोथार
-
फिसाजोनो होबाय सुथार गांसे
फिसाज्लानो लाबोबाय जेकेद गांसे
नाथाय कम्बलानो थाबोबावबाय
-
सेलाय लायो सानैजोँ
बिबो बोयो आंबो बोयो
बुरैनि दखनाखौ आं बोयो
आंनि गामसाखौ बुरैया बोयो
हरसे माब्लादि सोराङो फात्टा मोनलाया
-
दिनैबो रायजा हाजिरा मावैनि
गाबोनबो रायजागोन खामला मावैनि
बुरैया सिबाय माष्टारनि फिसाजोमोन
-
अनथाव बाथाव आखाय हांदोँ
औवा मुरा रोहो रोहो अरखियाव
थेनथौलायबाबो एम नांलिया
मानोना कम्बल गैया सिमां नुनो
-
उन्दुनो गोसो जायो
जायफोर सिमांखौ मोजां मोनो
सानै साथाम गदाय लानायनि सिमां
ख्रब ख्रब आफा खबो बयबो
आबौ हान्थु बोरायनि सल'।