आबौआनो सानसे बुंदोँमोन
बियो जौ फेनासो बुंदोँमोन नामा?
बाथ्राखौ हले गोसोआव दं
-
बोथोर नायै बोथोर
आबादखौ माव
साननि हाबा सानाव
- बोथोरा सोरनि थाखाय?
-
मुगाया हासिब गनसिबादि देम्बायदोँ
एबा सिनजाबादि बायफ्लेदोँ
खर' गाज्रिफ्रा बेखौ बिजिरगोन
ना सोरबा कलन्जिया जिबिफ्रा?
-
आथिखालाव मोनसे गला
सोदोमस्रिनि गला बियो
बायना मोनो फान्नो हायो
बायदि गाब, गोबां बायदि
-
बेयाव फाइखारि लोब लोब
खानाय गुफुरनि मुवा
जोँ जोँनि मोदैजोँ
ना गोलोमदैजोँ सोलायदोँ?
थेवबो बिगुर गुफुर जानो हामारदोँसै?
-
नोङो सोदोमस्रि गलानि
मोदोमफ्रु साबोनजोँ हु
सुदेम थावजोँ देलाय
नोँनि गोमो सोलेरा सोलायमारदोँसै?
नोङो मोदोमफ्रु मोदोममारदोँसै?
-
आबौआबो बुंनो बावलांदोँमोन नामा?
बायनो हायोब्ला बाय
हायाबा नायनोबो दाआंगाय
गोदोनि सोलाव लालायनाय
थांलाय-फैलाय हि थोरनाय बोथोरा
बोरो बोरो बहाबाव?
-
साम'खौ दाबो मोनो
नाथाय बिदै दैगुलायो
लाय लाफाखौ बोथोरावनो फोयो
थेवबो एम्फौ अरो रोदायावनो
-
बाथ्रायाथ' सैथो
बोथोर नायै बोथोर
आबादखौ माव
नाथाय-
-
गोदो जोसा जोसा
दानिया बुसा बुसा
खान्थाल सायायाव बार जानाय
दानिया न'सिङाव पेन सालायनाय
आरोबाव माबा माबि....
बेफोरो समनि जौखोनाय
नाथाय सोदोमस्रिनि खुरख'नाय।
This poem has not been translated into any other language yet.
I would like to translate this poem