बोथोरनि आबाद बोथोराव
सान्नाय होननाय गोरबोआव
मावनायाव गियानआव
-
आबैया जेनेरेल
बोथोरा सोलायबाय थायोआनो
आबैयाबो रोजा गोबा हि
मावनायाव थानायाव
-
गोलोम बोथोरनि गोबा हि
सुरिदार मेख्ला हार्सानि
(हाप्पेनखौ गाना लाजियो)
गोजां बोथोरनि दखना बायदि
जा गोरोबो
(बुरैद्रायबाय बियो
लंफेनखौ गाना लाजियो)
-
स्लद गोलाव खानाय हगारनानै
फुंजानि फुंजानि
गुगुरुब बाथौ बोरायखौ खुलुमदोँ
-
खुदुमथाव लाथावथाव
बिनि उनाव
जोँमा सान गसाइखौ
आखाय खबजबै खुलुमदोँ
-
ठं ठं गिर्जानि घन्टाया रिँफैब्ला
देलायै साजायै
मिनि खुसि गिर्जायाव थांदोँ
लोगोआव मायरं थफ्लासे
-
फुंआव अबंलावरि गसाइ
बिनि उनाव परम ब्रह्म सोर्जिगिरि प्रभु
-
आल्ला होन्नाय खोनाब्ला
आल्लाखौनो होनफायो
कृष्ण होन्नाय खोनाब्ला
कृष्णखौनो होनफायो
राम होन्नाय खोनाब्ला
रामखौनो होनफायो बियो
-
मानोना आबैहा गियान दं
सोदोमस्रिनि गलायाव
बायलाय फानलाय खालामनो
बेहा थोजासे बेसेन दं
-
बियो बुङो-
नोँनो मैथा हाजि रांरासि
बारि गंथामनि सासेयानो जादोँ फान्थाम
जै आफा बाथौ बोरायनि
ॐ सान्ति सान्ति सान्ति
आमेन।
This poem has not been translated into any other language yet.
I would like to translate this poem