बमानि उखुन्दै नांनानै, बारुदनि, सिलाइनि उखुन्दै नांनानै
अख्रांआ दा हांगार गाब गादों
थौ, साराइ आरो थोरसि मानजिनायबादि जिग' जिग'
हांगार गुन्दैजों मानजिब्लाबो.........
अख्रांनि मैलाखौ रावबो सुस्रांनो हायाखै, नाजासेयावबो
दा आरोबाव दावहा; कुरुक्षेत्रआव जानाय
जोबथा हरनि दावहाबादि
सोरांनि जेबोखौनो मिजिं खालामनो हाया,
बेनि फिथाइआ सानै बायगर गथफोरा जिउ मोनसेमानि
सिगारेड् सोबनानै केनसार बेरामाव बुगिनांनायबादि
दिनैनि जुनिया अख्रांआव बिरनो नाजानाय दाउसिनफोरा
उखुन्दैजों मेगन आलौ होजानानै जल्दब गोग्लैयो,
बिरखांफिननो थाखाय गांखं होननाय जेबोआनो थाया
बेबादिनो जुब्रा जायो गोबां दाउसिन
मुलुगाव दा अर
उदैआव अर। खुगाआव अर। गोसोआव अर
बेयो हमनि अरबादि सालाइ फोलावो
इंराजिआव जायखौ बुङो-Globalization.
सैथोआ थैयो उदैनि अरआवनो
बिखा गोनां आसोल दावहारुआबो फावसयनाङो
रेबगना जेसेबांखि बाथ्रा बुङामानो
गोथै सहनि हांगारजों फबसिन जाबाय थायो-सैथो
This poem has not been translated into any other language yet.
I would like to translate this poem