अखाया हागाब्लाबो दैस्लुंआ थालाङो Poem by Ronjoy Brahma

मैदेर हाथाइ एबा मैसो गंनि खानजंखौ
नागिरबाबो मोनथ'वाखै
Rani mirror एबा खरलेब आयनाखौ
बहाबा दोनफ्लांनानै बावगारदोँमोन
अब्लाबो-
जेनिबो राहायानो गोमाफेराखैमोन
-
बैग्रि बेलाथिनि गावराव गावराव बिलाइखौ
साबोन खालामनानै
एबा थिलाफारानि बालासियाखौ
स्राब सफेट खालामथ'नानै
मेगन गोजा गोजा जालायनाय दुगैखाङोमोन
-
सालबारिनि सेया खिबादि
एबा लावख्रिबारिनि खोथिया मैबादि
बालाजोँ मार्बलनि महल बानायनायखौ
सिमांआवबो गोब्रामलायदोँ
अंसि रानिजोँ नांलायनायखौ
-
सावथाल दुब्लियाव बालाबोथिया ना हमनो सेलायनाय
नाथाय आमटेका दैसायाव खांख्रायखौ हले
रावबो हमनो सेलायबायामोन
खेबसेखालि अंसिया न'सिम खेबजाबोदोँ
गाबै गाबै खारबोदोँमोन सिबाय
बैफोरखौ सिमांआव दाबो नुयो
-
गान्दौलाखौ गान्थ'थै होन्नाय
खेरेन्दायखौ सुन्दाय होन्नाय
आरोखौ आमफानै होन्नाय
बेयावबो खम नांलायोमोन
लंलिया नार्जारिजोँ आङो
बेखौनो दाबो गोब्राम बावोसो
-
बै समाव जोबोद अखा हादोँमोन
माबादि हायामोनथाय गोसोआव गैलिया
अब्लाबो-
गोसोआव दं दाबोनो
अखा सिजाना बेसेबांदि गोसा लोमजादोँमोन।