बुब्लिया दान्दिसे हुब्लिरो Poem by Ronjoy Brahma

सान्दुंआ थिँ थिँ दुंखावदोँ
गोलोमदै गसरदोँ सोलेरनिफ्राय
गब्लं बोराया लेँसा खिथेबनाय
बावखा बान्नानै आलि आलि
अलसियानि लासै लासै थाबायदोँ
-
नारा थुलाब जानानै
ज्राम ज्राम आलौदोँ आदैया
नायफा माफा खालामदोँ
-
गोलोमदै गफ्रुदोँ खाफालाव
आखायजोँ बिलिरस्रां हरदोँ खेबले खेबले
-
आं सान्दोँ-
आङो दा जुंगाल गारनाय
एबा गाड़िनि सलजुरि बस'नाय
मासे मोसौ दामब्रा
(सोरबा आलि सौखुयोब्ला
गं फिस्रिनो हागौ आं)
-
हायाव खेँ थुखेँना बावखाखौ
सोरगिदिँ नायहरो गब्लंआ
गोरान सोलेर
गिलिर गोसोखौ लानानै
-
माय हाग्राफोरनि सावगारि
समायना गंस्रो गंस्रो
लामब्रि मुलाथि सासेया दब्लाय बिमा
-
बिसोर गुमा गोथाव बारसिनदोँ
सेलाय लायदोँ
ग्लाब ग्लाब सासेया मिनिदोँ
-
गोमोदोँ गब्लंआ
गोजोन्नाय मोनदोँ
नाथाय-
बिजिरस'नो हालिया
दान्दिसेनो सिरि थाफिनदोँ बिसोर
-
सान्दुंआ लह्राय लांदोँ
दाखासे अखोरांनि जोमैयाबो
मिनि मिनिजि मिनिफैदोँ
-
बावखाखौ बान्ना दं दं थाबाय फिनो
मिनिसुलु मिनिसुलु
-
गब्लंआ गोजोन्नायाव आं गोजोन
थेवबो-
गब्लंनिफ्राय आं गोजोनसिन
मानोना-
गब्लंआ आंखौ नुवाखै
आं नाथाय नुदोँ।