खोलोमनि हाथियार Poem by Ronjoy Brahma

जोँनि बारियाव जोँ फिसिनाय
मा बेलाइ हारिनि-
आबाद गाग्लिग्रा जुनार
लोदो लोदो मोसा लख्रा?
-
दैसा हाजो सेराव थाग्रा
सोदोमस्रि गोनां बर'मोन
दिनै बांलानि दन्दराव जखायसे बिसोर
सान्दुं नाङै मेलेमाव खुदै गारहरनो
जोँनि सोदोमस्रि सिफायग्रा बिसोर
-
खोनासं आंनि सुबुंफोर आंगोनि
आंगोनि आंगोथार थैनि
दिनै निउक्लियारनि मुगा
नांबावगौ राजखान्थिनि बुथुवा हाथियार?
-
मिथिगौ सुबुंफोर नोँसोर
एटमनि हांगार नांनाय अख्रांआव
जोँनि गुफुर दाउथुवादि
आवा-फावा जादोँ जेरैबो
-
दुखुनि गोसोम दुखु आय'
हां गोसोम हांगार सालाय
बेखायनो नै आंनि आंगोनि
आंनि मोन्दांथिया फोरमायो
-
नांगोल जुंगालानो जोँनि हाथियार
राव-हारिमु-सोदोमस्रियानो दाहाल
बिसोरखौ होहरनो गोजोन गायसननो
हानजा हानजा दावगालांनि फै
-
नांगौ नांबावगौ मोनसेबाव हाथियार
जोनो जोनो ख्लाब-ख्लिब
गोजोँ गोफार खोलोमनि हाथियार।