मोदैनि हायेनाव Poem by Ronjoy Brahma

नोँनि मोदैखौ आं हुगारलिया
आंनि मोदैखौ हुगारगोन सोर?
नोँनि मोदैजोँ आंनि मोदैयाव
ना खुरस्रा जावरिथोँसै
-
नोँनि मोदैयानो आंनाव नांबाय
आंनि गाबनायावनो नोङो गोजोनबाय?
बैसागुआ अब्लानो फैमारगोन
खौऔआ रोजाबनायनि देँखोजोँ
-
नोँनि मोदै आंनि मोदैजोँ
बिलाइ खिलिमारोब्ला बिफांआ
जोँ बिनिनो सायायाव संसार जादिनि
दैलो सुदेम गोजोन सन्दे
-
मिथिगौ नोङो मिथिगौ अनजालि
हाद्रिनि फावदारजोँ बिलाइफोरा देलाया
समायो सुदेम फुंनि निहोरजोँसो
बिनिखायनो जोँनि संसारा मोदैजोँसो
-
गोरान हाब्रुआव माय गाया
गोरान हाद्रियाव खौऔआ दुगैया
ना गैयै बिलोआव दाउब'आ मानो बानो
रजे नोँनि अनगा आङो माखौ सान्नो?
-
हा दै बार
बांग्रिँ सार-अन्थाइ
सान्दुं अखायावनो जागोन जोङो संसारखौ
नोँ आं नङाब्ला सोर अन्नो मिथिँगाखौ?
-
सोर्गोनि राजा थाथोँ
मुलुगनिबो राजा थाथोँ
नोँबो आंबो गोजोनै थागोन
रजे गोगोसिन मोदैनि हायेनाव।