आंनि रजे इभआ बोराबदोँ Poem by Ronjoy Brahma

सान्दासि आंनि गोसोआ
जेबो बिजिरख'नो हाया
थरथिँ थरथिँ ररिँबोनाय
मानि मोदै रजे मानि?
-
ओँखाम थफ्लायाव बोननानै
नोँ आंनो दुखुखौ होफैखांबाय
आरोबाव मानि मेथाइ रजे?
थिँ थिँ सान्दुं गोसायाव मानि?
-
नांगोलनि आन्थोर आन्थोर
थाबायबाय आरो थाबायबाय आं
थेवबोदि मानि जिँगा नोँहां रजे?
सहर हावारजोँ आगान सुरनो नोँथ' लुबैया
-
हालो-दैलो रायजो जानो
आंहाथ' सिमां दं नोँजोँनो
सानफ्लांनाय फोथायखेबस'खौ
मानो लोगोआव लाफाबावनो?
-
सिन्दुर बिबारनि सान गोरलैजोँ
आंनोथ' जुरिदोँ लैथोखौ बारनो
बाला गुदुंनि थुंगे गैयै जिउ लामाजोँ
मानिथो बान्दो थेबावनांगौ जाखो?
-
बै हुसरियाव नोँ दंमोन आंबो
बयनिबो गेजेर गेजेर
आखाय हमलायनानै-
रजे बावबाय नोङो बावबाय?
-
हुरा हुरा नोँ फैयोमोन आंनिसिम
सुमफ्राम फिथाइ लाना थाङोमोन
हुरा हुरा आंबो थाङोमोन नोँनिसिम
गलाब बिबारनि मोदोमनाय लाना फैयोमोन
-
मानि अन्दरासि आंनि रजे
आंनि मा बुब्लिनि?
बे जाहोना माब्लानि?
जाहिर जेब्लाबो नोँजोँ आंजोँदि
-
जिउ नोँ गाबनो ओँखारो दिनै
आंखौ मोजां मोन्नानै नङा?
होद जिउली सना दागाब
नोँनि बेफोर फावथिनाखौ
नायहर हनै जिमुथिया मिनिखुमादोँ।