बाजै! नोँ सिता नङा Poem by Ronjoy Brahma

गाबै गाबै उदांस्रिनि लामाजोँ
नोङो बिदाय हरदोँमोन आदाखौ
मोदैनि अखाखौ दखना आंसोलजोँ
रुखथानो हाया हाया
-
दिनै गावनि फायखिखौ लानानै
गोम गोम सिला गाफैनाय नंलिया आदाया
आरोबाव- -
गिहां खारहां ओँखाम बोथिसे
जाफैनाय नंलिया
-
आदाया राम जानो हानायमोनब्ला
हिमालय गिदिँ गिदिँ
सानसे नोँनि खाथियाव फैफिनगौमोन
नोँनि मोखांआव खुसिखौ दाफब फैगौमोन
-
दावहा मोनफ्रोम देरहायै देरहायै
नोँनि खाथियाव फैफिन हानायमोनब्ला
गोदानै जुरिगौमोन संसारखौ
नाथाय लंकानि लांगोनायावनो
आदानि जिउ रोथोना गोदोबाय
-
बाजै आदाया जुदि फैफिन हानायमोनब्ला
दिनै बयबोदि बेसे रंजागौमोन
मुलुगनि दांसाफोरा आरोबाव खेबसे
गाबनाय नंलियामोन!