सनानि सिमां Poem by Ronjoy Brahma

खेबसे नोँ नुनायबादि सनानि
मोनसे सिमां नुदोँमोन आं,
सिमांबादि आरो सिमांआव
जेरै आफाया आंनो खिन्थादोँमोन।
बांबुला आदैनि खखानि ना
हादिदग्लाया ग्लब ग्लब मनलांदोँ,
आसारनि गब्लफुनाय माय दुब्लियाव
सार अन्थाइ गलेगले गावग्लिदोँ।
राहाया दंमोन सियाल फाख्राखौ हमनो
बुरै आबैनि सियालनि सल',
नोँजोँ आंजोँ बावलाङो बेखौनो
मानोना नोँनि आंनि उदैयाव अर।
नंगौ नोँथां जोँ आबाद खालामो
दादागिरि गसाइया जालाङो,
आरो जोँ आबाद खालामो
सियाल लख्राया बोथ्रोदलाङो।
बेखायनो जोबोद अनसि अनसि
सिमांखौ जोथोन खालामबाय आं,
मैया नुनाय सनानि सिमां
मैला नांगोन माराम खागोन।
अदेबानि सोफै सोफै मोसा लख्रा
सोफै सोफै सैमा सियाल,
खबरदार लोगो थल्थब सिरिगोन
सायखंखौ नुनानै आरोबाव दालुबै।