सिख्रि सिख्ला: जाम्बा असुरनि खारनाय Poem by Ronjoy Brahma

गावनि मुंखौ खिन्थानो थाखायनो
बेसेबा साननिफ्रायनो हाग्रा बुंग्रा,
आवबाखौ जेरैबो नागिरबायो रायखसा
बेसेबा गोसो जाथारबाय फोरमायनो।
सानसेखालि बियो बेलगुरि फोथाराव
गोरगोर खारलांनायसै सुफिननि देँखो खोनानानै,
सहैयोब्ला बियो थैहाबनायसै
आवबाया बिनि खुग्लुबना सोदोबखौ गोमोनायसै।
होनबासो लावखार बिफांनि दालाइयाव जनानै
गोरबोनि देँखो हगारनाय आवबानि,
बोदोर बावलि सुफिना सिरि थानायसै।
आवबाया रायखसनि गोलाव गोलाव हां
हगारलाय लालाय बिखानि सोदोब खोनानानै नुआसै,
जोबोद रागा जोँनानै बियो बुंनायसै-
ओइ बाहाय सोर जाखो नोँलाइ?
बे मुलुगनि खुस्थरि बाराव
आंनि सुफिननि देँखोखौ नोङो आवबा खालामबाय,
एसेबां साहस नोङो हाबाब
सिखार सिखार नायहर मेगनाव।
होनबासो रायखसा दुबफुं सिखारबाय
मैखुन बेरनायबादि मोखांजोँ मिनिनानै बुंनायसै-
आं नोँनो खिन्थानो फैबायलै नोँथां
आंनि मुंखौ आं मोनबाय।
थांगार लायथारबाय बेसेबा हरा
बेबादि होननानै रायखसा बुंबाय,
होनबा आवबाया सोँबाय-
मा मुं नोँनि मुंआलाय बुं?
आरोबाव रायखसा खुसिसिन जाना बुंनायसै-
जाम्बा मोदाया बुंदोँदि,
आंनि मुङा जाम्बा असुर
आंलायनो सिगां रायखसमोन सासे।
बिनि उनाव अजगर जानायसै आं
मोसौ गायआ आंनि हाथाइखौ जोफाय गारदोँमोन,
होनबासो आवबाया बुंनायसै-
हाबाब बाहाय असुरसो नोँ?
अ-अ-सु-सु-रर अ सुथारनि र
अब्ला जाम्बा असुरा खिबुआव खि लानानै,
बिफां लाइफांखौ फिउ फिउ बारलांनानै
सालबारि अरननि मोसानि बासायाव एब्रेहैनायसै।