हारांगा रायखस हालमाजिया
हादराव गावनि उदै दामनानै फोसावबाय,
लोगो लोगो रोजासे थैनाय रायखसनि बिसि आरो फिसाफ्रा
खांग्रां खुग्लुब जेरैबो रोनावनो हमबाय।
मिथिनानै बोखाव रायखस राजानि फिसाज्ला खुग्लुब रायखसा
बिखा बुनानै सिगुण अरन फारसे खारलांनायसै,
मोसाखौ फेजेननो थाखाय बियो
बियो गिथाव गिदिरसिन मोसानि महर लानायसै।
अख्रांनि सख्ल'-बख्ल' गुफुर गुफुर जोमैया बिनि सोगोमनायाव
गिनानै बोजोँबा बोजोँ खारनो हमनायसै,
अरननि गासैबो दाउसिन-दाउला जिब-जुनार
खिबुआव खिलानानै हाजोनि थिखिनि मोनहैनायसै।
गोथौ गोथौ हा सिङाव हाबनानै थानाय
एम्फौफोरा ओँखारनानै खारनो हमबाय,
मोस्रोम उरिफोरा गावसोरनि फिसाफोरखौ
हानजा हानजा खारनो हमबाय।
फांसे आदुमब्रा बिफां सेराव उन्दुबाय थानाय जाम्बा असुर मोसाया
होनबा खुसिजोँ गोदानै फैनाय मोसानि सेराव फैनानै बुंनायसै-
ओइ बाहाय नोँलाइ मासे मोसासो
आंनि सेराव गियालना फैनाया नोङो जाम्बासो।
रोजासो रायखसफोरखौ गोदोना अरफ्लंनानै
आं मोनसे बिलो सोरजिबाय,
एबार नोँनि गोदोनाखौ अरफ्लंनानै
आं थैनि बिबारबारि सोरजिगोन।
होनबा खुग्लुब रायखस मोसाया
रागानि सायाव रागा थिखिनियाव दावखोबाय,
बिजोँ सोमोनांथाव गिलुबालु दावहा नांबाय
हाजो थिखिनिनि दाउसिनफ्रा नायहरनायसै।
लासै लासै बेबादिनो हर जालांनायसै
अख्रांनि हाथर्खिफ्रा गिनानै बहाबा थाखोमाबाय,
मुलुगाव बार थोबसेबो बाराखिसै
बोथोरा जोबोद गुदुं जाबाय।
बिसोर मेँनाय आरो जेन्नाय गैयै
हरसे खोमसिजोँ खोमसि बुलायनायसै,
अखानायै फुंआवनो खुग्लुब रायखसा जाम्बा असुरखौ
बिफानि फोरोँहरनाय आदबजोँ फेन्दा बोखावनायसै।
होनबा जाम्बा असुरनि जिउआ
मोनसे जायख्लंनि महर लानानै सोर्गोआव थांनायसै,
अब्लासो गोथै सह मोसाया
सासे रायखसनि महर लानायसै।
खुग्लुब रायखसा गावनि फंबाय
खांग्रां रायखस होन्नानै सिनायनो हमबाय,
बियो जोबोद गोसायै खुग्लुबना
होख्राव होख्राव गाबनो हमबाय।
बे समाव गिनानै सानजानि जारौ साना
स्रोब मेगन मेसेबना बहाबा थाखोमाबाय,
मावरिया हाजोनि दाउसिन दाउला
जिब-जुनार गासैबो थैहाब्बाय।
बुहुमा बांग्रिँनि महर लानायसै दान्दिसे
मुलुगनि गासैबो गोमोहाब्बाय,
बिसोर अबंखौ गाबज्रिनो हमबाय
दान्दिसे उनाव रायखसा सिखारनायसै।
खुग्लुब रायखसा फंबायनि गोथै सहखौ
खर'आव रुजुन्नानै बिफा बोखावनि सेराव सहैनायसै,
हादरनि गासैबो रायखसफोरा
जेसेबां हागौ खांग्रां खुग्लुब गाबनायसै।
This poem has not been translated into any other language yet.
I would like to translate this poem