हराव रायखसफोरा अलंबार ओँखारलायब्लाबो
बांबुला जोहोलावखौ नागिरना मोनाखिसै,
बेखायनो जेराव नागिर नागिर मेंग्लिदोँ
बिसोर बेयावनो हंख्रदना थादोँ।
लान्थ्रियै रायखसफोरा उन्दुना थानाय थावनि
फांसे गोजौ बिफांआव बांबुलाया गाखोना दं,
बियो खोमा माथुनासो आगोरमोन्नायसै
रायखसफोरनि गोसा गोसा हंख्रदनायाव।
सानजानि फैसालियाव साना नुजानाय लोगो लोगो
हारांगाया गावनि उदैखौ बुनानै बयखौबो फोजानायसै,
रायखसफोरा बेरला बेरथा बयबो सिरि मोन्नायसै
कझबारि अरनाव जेरैबो नागिरनो हमबाय बांबुलाखौ।
उनाव सासे रायखस सिखारि बोराया
गन्थंजोँ जोबोद थाल लाना मोदोमनाय मोन्नायसै,
हायाव बियो अन्थाइ जाबोरखौ
बोखार बोखार नागिरनो हमनायसै।
नाथाय जेरैबो नागिरना मोनैलाय
बोराया उन्दुनानै बंफांआव नायदावनायसै,
होनबासो बियो बांबुलाखौ नुहरना खुसि जाबाय
बियो उन्दुनायनिफ्राय सिखारनायसै।
हार्सिँङै सिरियै जाखुमानो सान्नानै बियो
रावनोबो खिन्थायालासेनो बिफांखौ सोमावनायसै,
ग्लुबग्लुब बारहुंखा बांग्रिँ मावनायबादि
गेरेमसा बिफांआ मावनो हमनायसै।
दालाइयाव हमथाबायनाय बांबुला जोहोलावा
उनाव हायाव जल्दब गोग्लैनायसै,
रायखस सिखारिया जोबोद खुसि जाबाय
बिखौ थब खन्नानै आखायाव लाबाय।
खुगा ब्लां फुवारनानै रायखसा
गावनि खुगायाव सोहां जाब्ला,
बांबुला जोहोलावा बुंनो हमबाय-
थैगोन थैगोन आंखौ जाब्ला!
ओइ आबौ आंखौ बहा लांनोब्रा
आंखौ हाखरावसो सोहरनो सानथारबाय नोङो?
हाबाब जोबोद दुखुनांथाव जाथारसिगोन
आंखौ जामारनोसै हाबाब नोङो?
होनबा रायखस बोराया बिखौ हायाव गारनायसै
आरोबाव खनखांना मननो नागिरनायसै,
बे समाव मासे रायखसा फैनानै
बिखौ गोदोना सेरथेबाय गोब्राबै।
बिसोर सानैजोँ सेलायनायसै
ओरैबादि सानैजोँ बुलायनायसैदि,
अरननि बंफांफ्रा दालाइफ्रा थेम थाम बायनो हमबाय
बिफांनि बिलाइफोरा ज्रयज्र सिरिबाय।
अन्थाइ बन्थफोरा ख्रुब ख्राब गेब्रुनायसै
होनबा बांबुला जोहोलावा गनायसै,
आरोबाव बांबुला जोहोलावा खारबाय
रायखसफोरा ज'ज' सफैबाय थावनियाव।
बिसोर बांबुलाखौ होंगो दोँगो
बंफांफोराव सौदाव सौसि होसोनायसै,
बारबादि गोख्रै खारनायसै बांबुलाया
उनाव मेंब्ला रायखसफ्रा मोनहां मोनहां जानायसै।
गावनि मेगनाव खैफोदखौ नुनानै
खांख्रिखला अरननि मासे गान्दौला राजाया,
बिखौ गावनि बिखुंआव थिखोना बिरलांनायसै
बेबादिनो रायखसफ्रा बिखौ आन्दायनायसै।
This poem has not been translated into any other language yet.
I would like to translate this poem