हारिनि गोदो लांनो नागिरनाय आरो
हारिनि गोदो लांनाय
जारिमिनारि नेरसोनफोरखौ सोर
बुरखांबावनांगौ जाखो?
जारिमिनखौ लाना जेबोला
बिजिरफ्ले बिजिरफ्ले नायबिजिरगोन
अब्लासो थार गुमुर थुनलाइनि सोदोमस्रिया
बेरखांगोन ।
सम बोथोरजोँ
जुजिथाब जुजिथाब
सोरजिनांगोन बर' रावनि थुनलाइ
बिब्दिब्लासो बर' रावआ
मुलुकआव
गेवलांसार जानो हागोन ।
दाफुंनांगोन जोँ गावखौ साफा साफा
हारि सिबिसुला-सिबिसुलि
थुनलाइ सोरजिगिरि ।
अब्लासो गोरबोनि सानख'थियानो
दाफुंगोन थुनलाइनि बासा;
सुबुं माहारिनाव दं गांनाय-उखैनाय
थिख दं बेबादिनो-
बर' राव थुनलाइनियावबो
अराय उखैनाय ।
बिब्दिब्ला जोँ मानो नाजादिया
मानो खुगाजोँल' सावरायखो?
खुगाजोँ गोब्रामब्ला बावगार लांगोनसो
लिरनानै सोरजियोबोला
नाथाय
बारायगोन सानफा-एफा ।
बिदिब्ला खौसेयै नाजादिनि
मुलुकआव बर'नि राव थुनलाइखौ
आबुं खालामदिनि;
मैखोमै बर' रावखौ
गेवलांसार होदिनि
गासै हारियानो दावगाबोला
गासैबो रावनि थुनलाइयानो
गेवलां सारबायब्ला
जोँल' थानो माबोरै फावसायना?
सोरजिदिनि जोँबो आबुंङै
बर'नि राव थुनलाइ
नाजादिनि मिलौहाबनाय
गोदै बिदै गोनां खालामदिनि
बर'नि रावखौ ।
अबोलासो बर' हारिया
गावनि बिमानि रावजोँ
बुहुमाव सोलि हागोन
मुलुगाव बर' होनना
सिनाय जागोन ।
This poem has not been translated into any other language yet.
I would like to translate this poem