गोसोआ सानबायो हरफा Poem by Ronjoy Brahma

फंसे रावजोँ फोरमायलाङा
जेबो जेबो बोसोन होलाङा
मिनिसुलु जारौ मोखाङै
जोँमा साना बिदाय लालांब्ला
आं सान्दोँमोन बियो आंखौ बुंदोँ
हर फैगौ खोमसि जाबौगौ
फैगौ हराव गोजोनै उन्दु।

नाथाय आंनि सानफ्लांनायबोल'
गेफे सानजावलिनि,
हरफा बाबेन लांबाय थेवबो
सांग्रेमा-गुमा-खांखमा
बेमा-ससमा उन्दुलांबाय थेवबो
एमावनो आंहा गोसो होआखै
मेगन मेसेबनायनि मिजिँखौथ' थियाखैनो

बार'नबोनाय सानखौ लोगो मोननायनिफ्राय
मिनिसुलु मिनिसुलु जारौ रायज्लायनायसिम
आं बेखौनो नायना दंमोन
फैसालियाव समजोँ लोगोसे
आखाय सोमावजासिम

दाबो आं नुयो समायना
मोले साथिनि खावसे सोरांनि हायनाजोँ
जेराव साबसिन हामसिन
बेमा-गोमोथिँ-थाम्फैनि हेँथा गैया
दैज्लांनि ज्रबगासे अखाजोँ सिरि मोननाय
एम्बु थेफा आरो एम्बु बोरमा
बंग्ला-स्त्र-थेरेमोनहा दहायनो हंख्रदना मेँग्लिबाय।