अरन सिँखाव सिँखाव
बोलो फोरा फोरा
दोँसेल' लामाजोँ
होसिख्राव होसिख्राव
रेला खारदोँ ।
गांखं बुब्राब बुब्राब
सान्दुं अखा नेवसि नेवसि
बिरदोँ अखोरांआव
लोगो गैयै
साहसि मासे थियाया ।
हाजो दन्दर सिँखाव सिँखाव
जिरि जिरि दैसा निजोराया
बोहैबोदोँ बेसेबा गोहोजोँ ।
गोजोँ जोँमा अखाफोरा
मिनिखैरो
जोँदोँ हारसिँङैनो
साननि मददजोँ
जोँमा महरै मिनि हरै
मुलुगाव ।
आं दाबो जाम्बा ज'ला
सोरखौ नेनानै थाबाय थाखो आंलाइ?
सोरबा फैनांगौ दङ नामा?
ना आंनि थांनांगौ समनि
बेला गाबाखै दाबोनो?
समा जाथारगोन
बेला गाबखां थारगोन
थ' मानो थाबाय थाखो
लासै लासै खारस्लिउ
खारस्लिउ-
गोख्रैब्ला सौथुफ्लांथारगोन ।
अखाफोरखौ नङाब्ला हार्थखिखौ
गोसोआ नायनो लुबैथारोना?
सौहैगोन नोङो गावखौ
साजाय साजाय-
खेबसेनो नोङो बिरनो हाया
दहमै नोङो बारनो हाया
बेला गोग्लैनायनि उनाव
समा खान्दा बेखौ हले मिथिखा
बिनिखायनो थौ लासै लासै
गावखौ साजाय सिरि सिरि ।
आं दाबो जाम्बा ज'ला
जिउ गैयै देहानि उरांआ
नायहर हनै सान हर
हान्था मेला
आरो रुगुं गैयै
अख्रांनि बिखुंआव
मोसा मोसा आंखौ सोमोदोँ ।
बैसुमुथिनि देहायाव जोनोम मोननाय
नै दहायनिसो फुंनि बिबारफ्रा
गावखौ साजायदोँ मिनिस्लु रंजास्लु ।
आं दाबो जाम्बा ज'ला
कलम गंसेखौनो गोरायै
दैनो रोङा
रग' रग' गोथां
खालिनि बिलिरनाय
बिजाब गांसेनि हांखो सिनाया,
हनै नुदोँना मालाय गुबुना
मोसेबनानैबो नुदोँ
साहानि दैया खोलाहा बोहैनाय
सानजानि साना सोनाबहा हाबनाय ।
आं दाबो जाम्बा ज'ला
गुफुर दाउब'लाय
जागोननो गोसोम दाउखा
दैमानि खर'आ सोलायगोन
उल्टा बोहैगोन साहा-
खोला(?)
आं दाबो जाम्बा ज'ला
फारनै गोबौ ब्लेद
आगदा आखायजोँ दाबो
दैनो रोङा
लैथो दिङानि लोरगि
गुदि बिजौ दाबो
सिनाय रोङा ।
This poem has not been translated into any other language yet.
I would like to translate this poem