मोजां मोनो बियो Poem by Ronjoy Brahma

आरोबाव बियो आंखौ नायो
बिनि मेगना जोँख्लाबो,
आं मोदान्नाय मोन्दोँ मेगनाव
बिनि गावदां मोखांखौ
नायगंदोँ आं बेखायनो दान्दिसे ।
दा बियो आंखौ मिथिगौ
मोजां मोनो बियो
मोजां मोनो बियो,
लाजिनाया फ्लाम मोफ्लामो
दैस्लुं मानबायो, आथिँआव हमो ।
जागायनाय थासारियाव द्रोद फावसायो
बेनि उनाव- आं नायना थायो
आं गोरबोआव लानो हायाखै
मानो मिजौदोँ ज्रोम ज्रोम लाजिस्लु ।
बियो थारै मिथिगौ
बियो आरो हास्थायो, आरो आं
उसु खुथु नुदोँ सोलेरखौ
मानो सिँहाब गोरबोआव लुबैदोँ ।
बियो मिथिगौ, बियो आंखौ
दा स्राय बारा बारदोँ
बेयावनो दं आं गोजावनानै,
साजायनाय बिनि खानाया जायब्रुं जादोँ
मानोना बियो सोलेरनि गांहाबदोँ मोनसे ।
ओरैनो बारग'लांनोसै सानहाबना
बियो हाथासि मोखांआव,
बियो बुंनो हायाखै, आरोबाव
बियो आंखौ बामख्रबनो लाजिदोँ ।
आं मिथिगौ ओरैनोसो
बियो आंखौ लाजिदों,
बियो आंनि गासैबो आरो
मोजां मोनजानाय सोलेरा ।
बियो आंखौ एरायनो होआ
आं गासैबो बिनि आरो
बियो आंखौ मोजां मोनो ।
बेयो मोजां सावगारि
दान्दिसे रमान्सनि भावना
बियो आरो सान्दोँल'
बे जिउआव बेयो दाजागोन
बबे फैसालिनि थासारियाव ।
आं बेखौ थांनो होआखै
नायनोल' लुबैदोँ आं सानहाबना
बियो आंखौ बुंनो होआखै
नायनोल' दिन्थिदोँ लाजिस्लु
मोजां मोनो बियो
मोजां मोनो बियो
मिनिस्लु फोरमायदोँ फावजोँनो ।