रामोन्दानि ट्रेजिडी Poem by Ronjoy Brahma

रामोन्दाया सानदोँ हार्सिँङै
हाल-खदाल दोननानै
- दाहोना थायै थायै बोराय लांबाय
आरोबाव बियो सानदोँ
गोजाम बिसम्बिखौ लानानै
- सिमांसो सानबाय नोँ
गेलेलायनायखौ सानैनि
आंबो दिनै साया मायासो नांबाय
गोबा गोबा नोँनि अहाया खुदुमनायखौ।
आगोर मोना मोना रामोन्दाया
जरासे दुब्लि खनानि
गोबालायनाय एम्बु थेरेखौ नायगोमोयो।
उन्दै उन्दै जिबिनि जुलिया जालांबाय
मानसि जानानै रामोन्दा
आं जाबाय खाफाल मोन्दा
बहा थांखो हाबाब गसाइ
मायहुं खनायाव रायज्लायनाया?
फाथो लामनायाव जंखायलायनाया?
ओरैनो थांबाय बैसागुआ
दाउ खौऔआ आंखौ ओरैनो
जंखायलांबाय गोदै गारांजोँ
आं सान्नायबादि जुलिनि देँखोआ
गैया गैया मोकथां जायाखिसै
अनजालिया जुलि जाबाय
आंबादि बैसुमुथिनि सावगारि बोग्रा
जिबिनो गांसो होग्रा
समाजनि सासे जुनारखौ नेवसिलांबाय।
दालिगामिनि सोरांखौ बयबो अनसायो
आंनि अनजालियाबो सासे
नाथाय बिनि गेस्आ नांब्लासो
मिजिँआ खावसे हांगार जागोन।
आंनि दुखुआ दाबो दुखु
लामानि थायलाद' लान्थ'
साया गैयै सोरांआव
जोँदि सानैजोँ समाय लादोँ
दैज्लांनि अखाजोँ बियोदि
सोमखोर महरसो
सार-अन्थाइ गावजायाखै।