आबौ/ आबौनि गालांनाय थांखु थेमानिफ्राय Poem by Ronjoy Brahma

जिबा बोसोरनो सिगांआव आबौआ रुंसार जाबाय
मानो जाया जानो
खानाय दारि आफाहानो मोनलायबायब्ला?
आबौआ बिहामजो जंखायनो रोँगौमोन
सेर्जा-सिफुं दामनो रोँगौब्ला
मानोथो खारफाया जानोमोन रुवाथिफ्रा?
उल्टा आखलखौ आफाया सोलोँदोँ
आबौखौ सोँखारि सोँखारि
गाजा खन्थाइ आफाया लिरबायदोँ
आंखौबो फोरोँबाय
(बिफा जोलै फिसा) होन्नायबादि।
आफानि बाख्रि दांगोनाव सैना दोन्नाय
बार्लि हाबजानाय सेन फाइरियाव
बालाखावा, ना खान्दा
बोथिया बाब्राब, गोरैया हाबाखै
हाबनानै दं थांखु थेमासो
बिनिनो सिँङाव गांसे लाइजाम आबौनि,
आबौआ लिरदोँ सिनायगोन सिनाया
बांला हांखोजोँ बर'राव
खुनुरुखुम आं फरायनो रोँदोँ-
''जुगा सोलायगौ फिसाफोर
गोजाम मानि गोमा लांगौ
जोँ जायोमोन गलायाव
नला फिथर जि फैसानि थरब्रै थरबा
नैजि फैसा सारेनानि सुमफ्राम फिथाइ, था रुनाय
से रांनि माइरं सेरसे
आंनि बागानाव दंङ थालिर आथिया
जाम्बुरा, था गान्दा मोदोमफ्रु फिथाइ
नोँसोरनि दिनाव गोमालांसिगोन फिसाफोर!
गोजां बोथोर, मोजां बोथोराव
सेर्जा दामै दामै सल' खिन्थाग्रा
नोँसिनि दिनाव थानाय नंलिया,
नोँसोर अलसिया जानो हमबाय फिसाफोर
बेखायनो जुगाबो बेल्थायबाय
नांगोल-जुंगाल, जेखाय-खबाय
इसान-सिखान, जान्था-दुमसु-खफ्रि
मोसौ गलि, बोरमा गग्रा, अमानि गन्द्रा
खेराइ-गार्जा, मागो-दमासि थायाब्ला
बर' बर' मोनामनाय हारिया गोमालांसिगोन
जोँ जायोमोन अनला खारै
नाफाम बाथोन, औवा मेवाइ
नार्जी ओँख्रि खाइला, गांजेमा बाथोन
नोँसोरनि दिनाव नोँसोरनि
फिसा फिसौफोरा मुगैसिनथारगोन,
नाथाय बिसोरो सोलोँगोन
लैथोनि बेदर गेसाव जानो
मानसि गोथै बेदर गेसाव जाग्रा
कमलकार खावै रौ कमप्लेक्स
दानफा गोथै बर'पआव खोबहाबना दोन्नाय
महर गोसा नाखौ जानो,
सानफा खागोदावना दोन्नाय
थाम्फै बासा लानाय
बोरमा-अमा बेदर जानो
हुसियार हुसियार फिसाफोर
मोसौ गायखेर जानो दानागार
मोसौ गायखेर जाब्ला मुलुगानो बिमा''
आबौआ आरोबाव लिराखिसै
हांखोखौ आंबो द्लाम सिनायाखिसै
नांगोल दाननो रोङै आफाया
बेखायनोसो दाना जोथोन लायो
उरि जासि जासि,
आबौ हेबना गालांनाय सेन फाइरिया
बेखायनो दाबो दं;
जेखाय- खबाय, सान्दांगा- सान्द्री
दारहा-खादा, फल'-ख'खा
माखु-जेन्थोर, थार-रासो
उवाल-गाइहेन-खफ्रि-थाउख्रि
सेर्जा-खाम-सिफुं बायदि
खामानियाव बाहायाब्लाबो
नेर्सोन महरै बेखायनो
अनसि अनसि आफाया दोन्दोँ
बेफोरखौलाय मानो नांबावगौ?
सावगार जोबदिनि-
होंगो-दोँगो सिमेन्टनि आर सि सि न'आव नुब्ला
आफाखौ बुङो आं-
आफाया अब्ला बुङो-
''गोजाम मानि गाज्रि नङा
गोदान मानि मोजांजोब सानजाया
इंराजियाव गैया होमब्ला?
अल इस गल्ड होन्नाया? ''
नाथाय अब्लाबो सान्स लायो आं
मोनोब्ला सावगार जोबसिगोन-
नाथाय बिरि सिगारेड् सोबि
जौ, ना-बेदर जायै सादु
माइ महनसे थिखोनो हाबावनाय
आफायादि माब्ला थैगोनथाइ?
सानफ्रोम फुं बेलासि हुम यज्ञ होग्रा
सोर्गोआव ना फाथालाव थांगोन बेबा?