गोसोनि सान्नाय बेरामाव
आं लेलाइ लेलाइ बाब्राबो
आंखौ हाजासे जोथोन लाबाय
अनसुलि बिमाया इसोरनियाव
दाख्राय दाख्राय हाजासे आर'ज गाबबाय।
नाथाय बयहाबो सानसे समा फैयो
सोरजिनि अन्दर दरा गेङो
आङो साजायना थांनो ओँखारो
समायना-रमायना सोरजिनि देरायाव।
आं आयखौ लांफानो हाया
लोगोसे गावनि आंगो गासैबो
आङो बिदाय लानो आयखौ खुलुमो
खुलुमो बिब' बिदा बैसो गोराफोरखौ
उन्दै बैसोनि आंगोखौ बोसोन होनानै।
आयआ फिसानि दिखाराव
खोमानांगोन मोकथां सावगारिखौ दुखुजोँ
हब्रा हब्रा गाबो आरो गाबो
आयनि मोदै हुगारनानै
गावनि मोन्दांथि संसारनि रोँमोन्थिखौ
फंनैसो बुङो आं-
आयै, - गाबनाया घोरोम नङा
गाबनायजोँ जुजिनो संसाराव नांगौ,
दुखुआ संसारनि मिजिँ नङा
दुखु खालामना मोदैखौ फसर नाङा।
आयै आं थांनोसै-
दै गरदसेल' आंनो लाबो
आं संसारनि बिदैखौ बेयावनो फोजोबनि
जायखौ जोनोमनिफ्राय बेजोँनो गोजोनदोँ
बे दैया रानलाङा आयै
जिउ जिबिफोरा थांना थासान्दि,
दै गरदसेखौ खुसियै लोँना
फंनैसो बुंबावो आं-
आयै उन्दै उन्दै नोँनि
फिसाफोरा दंबावो
नाथाय नोँ जायखौ जोनोम होदोँ
नोँ सासेल'सै सानो,
बिखौ नोजोर हो आयै
मानसिबादि मानसि खालाम
बियो गाज्रियाव गोदोआ जेन'
नंखायाव गोजावआ जेरैबादि,
नोँखौ जोथोन लागोन बियो
नोँखौ आलो गोजोन फोथांगोन;
बिनि हाबिला गोथार नाजानायखौ
बिजिरस'यै हेँथा दाहो,
बिनि अलसिया मेलेम उननो
नाजानाय गैयै गोसोखौसो हेँथा हो।
बाथ्रा फोजोबना खुसियै
मिनिखुसि गोजोनै हरै
बिरलाङो आं आलो आलो
ऊँ होन्नानै मुं सोरजिनि।
This poem has not been translated into any other language yet.
I would like to translate this poem