उन्दैनिफ्रायनो आं जाय खामानिखौ मावबाय
बै खामानिखौ मोजां मोनबाय।
नाथाय आंनि खामानिया दावखोदोँ
नांगोलनि आन्थोर आन्थोर फैदोँ।
आङो लावखार जाबाय
दिनै दाहोना जाबाय।
बैसोआ द्लाम सबाय
जुलिनि समाबो फैबाय।
नाथाय सान्नायनि रोदायाव
माबा मोनसे मोन्दांथियाव
आङो गिनाय फैबाय।
आं बुजिबाय थारै बुजिबाय
बेसेबा बैसोनि सिमब्रेनाय
आं दिनै खुद्रिबाय गोरबोआव।
आफाया आंखौ खाना खालामबाय
बयबो दिनै आंखौ थगायबाय।
आं लावखार थानांदोँ
खामानि फेहेरना होजादोँ
जाम्बाबादि आं मावदोँ
नाथाय आंहा जेबो गैया!
माबा मुलाम्फा जेबो गैया! !
जुलि जानांगौ, संसार फाथिनांगौ
गथ'- गथाय जोनोम-
फेदेरनांगौ- फोलावनांगौ
नाथाय आंनि बौथुवा मेलेमा
फिसा- फिसौ माब्रै सिखायनो?
आंनो रोङा आंनि फिसाया-
बेसे आवगायनो? बेसे आवगायनो?
मुलुगादि साग्लोबदोँ बुजिस'यै
मेगनजोँ नुयै मेलेमनि जुजिनाय
आंनि फिसाफ्रा सोरनि लावखार
सोरनि बखालि जाबावनो?
बेयो जाबाय जाला दाहोनानि
गोजावलाय थब्ललाय
हां लाख'लायै खुगानि राव
गोरबोनिफ्राय फुवा फुवा ग'बोनाय।
दा बे दाहोनाया गैलिया
बहा थांखो खौरां गैया
नाथाय सिबाय मावथिथारमोन।
मानसिफ्रा सानो बियो थैबायसो!
गोदान मुगाखौ बियो गिदोँ?
मानोना इयुननि मिजिँ जाय रनसाया
थांना थानायनि बेहा मुलाम्फा गैया
थांना थानायल'आनो जिउ नङा।
This poem has not been translated into any other language yet.
I would like to translate this poem