अखा- 06 सख्ल'-मेख्ल'नि थैनाय Poem by Ronjoy Brahma

103
सानसेखालि गोजां बोथोराव
अर सायदोँ गिरगिर जोँनाय अर सेराव।
दाउराइ जोलाया सल' खिन्थाबाय
अखाया गोसो होना खोनासंबाय।
104
लावख्रि अरन बारियाव
लांसुनिया सानै फलान दं।
बिसोर बे अरनखौ सोगाबो
बे अरननि जिउ-जिबिखौ गावथारगासिनो दं।
105
गोबां दाउसिना हार्सिँ जाबाय
खायसे जो-जोला गोमाजाबाय।
गोबां जुनारनि जिउ थांबाय
फलाना गोसोबायदि गावथारबाय।
106
अरननि गासैबो मोदैजोँ बुंदोँ
बे अरनाव गिनांगौ जाबाय।
बे अरननि मिनिनाय गोमादोँ
अरननि गोरबोआव खामग्लिदोँ।
107
बेबादिनो अखानि मेगनाव मोदै गबाय
दाउराइ जोलाया खिन्थाबाय।
अखाया गोसो बोरखांबाय
फलाननि फारसे रागा जोँखांबाय।
108
दाउराइ जोलाया अखाखौ बुंबाय-
नोँ देरहाथारगोन जोहोलाव
बे फलानखौ नोङो बुथारनांगोन
फलाननि जिउ फोजोबनो समा जाबाय।
109
बे अरननि रोजा रोजा जिबिखौ
नोङो रैखा खालामनांगोन।
गासैबो दाउसिनखौ उदां खालामनांगोन
लाबोफिन्नांगोन बिसोरनि मोन्थाइखौ।
110
बे अरननि मोदैखौ हुगारनांगोन
अरननि बिफां-लाइफांनि मोदैखौ।
बयखौबो रंजानो होनांगोन
होनांगोन बयनोबो थांनानै थानोखौ।
111
दाउराइ जोलानि बाथ्राखौ खोनाना
अखाया बिनि समाय लाबाय।
बियो बे अरनखौ गिदिँबाय
बयनो गिदिँबाय साग्रिद होना।
112
अमा बोराया आदार उरनाय समाव
सानसेखालि सख्ल'-मेख्ल'आ गावथारबाय।
बोराय अमाया बाब्राब बाब्राब थैबाय
फलानफ्रा हायाखिसै थिखोनो।
113
सख्ल'आ लोगो लेँनो खारलांबाय
मेख्ल'आ अमाखौ नेबाय।
मोसानि गोम सोगोमनायाव
मेख्ल'आ जोबोद गिबाय।
114
उनाव बियो फांसे बिफांआव गाखोबाय
मोसा फालोआ नुजाफैबाय।
अखा जोहोलावआ सफैनायसै
बियो हाग्रा मुलि होना फोथांनायसै।
115
अमा फालोआ खुसि जाफिनबाय
बोराय अमाया जिउ मोनफिनबाय।
बिसोर हानजा हानजा थांनायसै
सोर्गोआव जमा थांफिन्नायसै।
116
अरना समायना मिनिस्लुबाय
बिफांनि बिलाइया आखाय खबबाय।
दाउसिनफ्रा मेथाइ रोजाब्बाय
मेख्ल'आ जोबोद सोमोनांबाय।
117
अखा जोहोलावमोना थांबाय
सख्ल'आ लोगोफोर लाना सफैनायसै।
गंसे मोसौ गारि लाबोबाय
बिसोर खुसियै मोसाबोबाय।
118
उनाव बिसोर अमाखौ नुवाखिसै
मेख्ल'आ गासैखौबो खिन्थाबाय।
बिसोर ग्रुम सिलाइ गावबाय
बिसोर उनाव अरनाव गिदिँनायसै।
119
मासे दाउमासारखौ बिसोर गावथारबाय
दाउमासार जोलाया गाबख्रावबाय।
अरन गंसे गोमखांबाय दुखुनि देँखो
गासै दाउसिना रोजाब्बाय खैफोदनि देँखो।
120
अखाया खोनानानै होसोलांबाय
जिब-जुनारफोरा थांफाबाय।
मेख्ल'आ अखाखौ नुनानै
बुंबाय लोगोफोरनो खिन्थानानै-
121
बिनोमोन बिनो हारामजादाया
बिखौ गोख्रैनो गावथारदो।
माबार जमखौ लेँहरदो
बिनि जिउखौ लांथोँ जमा।
122
लोगो लोगो सख्ल'आ गावबाय
अखाया एरायना बंफांआव थाखोमाबाय।
फलाना आरो गावबावबाय
अखाया गुलिखौ अन्थाइजोँ खुबैबाय।
123
गुलिया अख्रांजोँ थांनानै बिलोआव गोग्लैबाय
बिलोआ ज्रिँ रानज्रिँबाय।
फलाना आरोबाव गावहरबाय
अखाया अन्थाइ खुबैबाय।
124
सिलाइजोँ बुनो फलाना होसोलांबाय
अखाया अन्थाइजोँ गोख्रै खुबैबाय।
सख्ल'आ माथायाव नांजाबाय
उनाव बियो बाब्राबना थैबाय।
125
सख्ल'नि गुदुं थै नांनानै
बिफांफोरा बाज्लखांनायसै।
मेख्ल'आ अखाखौ दान्नो होसोबाय
अखाया मिनिनानै खारबाय।
126
मासे मोसाया बिखौ बारसिन्नायसै
आरो बिनि गोदोनाखौ मस्रायबाय।
गोबां मोसाया फालो फैबाय
बिसोर फलाननि थै लोँनायसै।
127
सख्ल'-मेख्ल'नि लोगोफोरा
गासैबो फोर्लाब-फोर्थाब खारनायसै।
फालो फालो मोख्राफोरा
बिसोरखौ लावथि अन्थाइजोँ खुबैनायसै।
128
बिसोर बंफांआव सौथुनानै गोग्लैबाय
बेन्दोँफ्रा बिसोरखौ हमथाबाय।
बिसोरखौ मोसाया बारसिन्नायसै
माखासे मोसौ गारिखौ दाब्रायलांनायसै।
129
मोसौ गारिया रोमै रोमै बिरलांबाय
लामायाव हाद्रि फांथेबाय।
अरना बिसोरखौ नुहराखिसै
बिसोर बहाबा गोमाहैनायसै।
130
लावख्रि अरनाव उदांनि मेथाइ रिँखांबाय
बयबो सान हर रंजाबाय।
बेबादिनो रोजासे बोसोर थांनानै
अरना सोमखोर जाबोनासै।