थिरिँ बिरिँ 45-90 Poem by Ronjoy Brahma

45
थरथिँनै मोदैया लासैनो
खावलाय खनाजोँ दुद्रुयो,
गोरबोनि दाहाया होज्राख्रावो
बेवबो रंजा रंजा मोसायो दसे।
46
मेगननि मोदै हुगारनानै
गोसोनि दिखारखौ दबथायनो,
आगोरमोनि हास्थायो जिउआव
बिखाया ग्लुब ग्लुब मावो।
47
सुखु रंजासोमनायनि दखरसे
रंजा रंजा मोसायो हादोराव,
जिउनि गोजोना बेवनो दसे
गले गले लुबैयो बेखौनो।
48
साननि सोरांङाव खोमसि सिमां
गोदो गोदो मुहिहाबो,
रंजानाय गैयै गोरबोआव
आरोबाव नारसोमो सानस्रि।
49
जिरि जिरि बोहैनाय गोरबोनि
सुग्लायथारो जिउआव दसे,
दुफावलु खोमोननि गस्लाया गैया
दबथाय हाया ससे हान्थियाव।
50
जिउ सानस्रियाव गोदौदोँ
हारा नाख्रेबनानै
जुजिनो नांगोन थांखियाव
घड़ि खाटा फिदिँना
सम सानखौ साजायनांगोन।
51
सोलोँथाइनि सोरां
मेगननि थोँगोर बेरलाव
नुहरो नायहरब्ला समायना।
52
गोरबोआव जाखांदोँ एवथुनाय
मोन्दांदोँ सोलेरा आंनि,
आय'
मा मिजिँ गाग्लोबो बेयोदि।
53
सांग्रेमा बिरनाय मेगन फैसालियाव
जाखांदोँ साया साया
सानस्रिया बिरो आन्दो
गोरबोनि दाबसे इसिँङाव।
54
दुफावलु जोमै गुफुर
सेर सेर गोसोआ रंजादोँ,
गोरबोआ आंनि मोसादोँ
जोमैनि सिंङाव एब्रेयो।
55
बाहागो लादोँ गोदौनाय गोरबोआव
जाख्लाब फैयो सानस्रिखौ
उसु खुथु आंनि थाथिआव।
56
गोमोयो आं थाथिरै समाव
जोँमानि रिफिनाय मोदानो,
आरोबाव गोरबोआव एदावो
मिनिनाय
सानस्रिया गोजावो।
57
जिउनि मोनसे जिनिरा नाङो
गोरबोआव दाहार जायो,
अनसायना बिलिर बिलिर
बुरखायना हान्थिनागिरो मिजिँङाव।
58
हरटात मोनखांदोँ गोसोआव
फुजानि हब्रानाय नांफैयो,
गोसोआ खाथियाव बिरबायो
हनै मानोबा हांखुर जादोँ।
59
गोसोआव लाजिखांनाय जायो
गावनि देलायनाया खामसाव,
एब्रेनो नाजायो आन्दोयै
गियान सानस्रिया मानोबा बोबथायो।
60
नायगोमोयो मेगना गोबां साजायनाय
सावगारिया फेजेनो मेगनखौ,
गोरबोआव गोबां सानस्रि
थब्ल'लाय गोजावलाय दै दाहाराव।
61
बिर बिर
सांग्रेमा बिरो मोखांआव
मानोबा गोरबोआव रंजानाय,
जायाखै आरो मिनिनाय
मुहिना नायो सोरां सारफावनाय।
62
हां सेरथेयो सिमांआव
बिरबायो गोजान रायजोआव,
थाथिरना जिराया आंनियाव
गोजोन्नाय जोँमा सोरां फुंआव।
63
देरहासादनाय मिजिँ रनसायो
गोरबोआव बे सान्नाय नङा,
हाथासि नांथाब जुजिनाय।
64
रंजानाय जाया मोनसेनि देरहानाय
नांथाब जुजिनाय आरोबाव
फेलेँनि बाब्राबनाय दिखारसो।
65
आरोबाव फेलेँनि गासोमनाय
बाब्राबो गोरबोआ
हाथासि जखम,
दै गुथालजोँ सिमब्रेयो दाहाराव
जुजियो लामायाव आगान होनो।
66
गंग्लायना खुलुमो जोँमाखौ
हास्थायो माबा गोगो गोहो,
हमदांना आरोबाव नागिरो
सना गाबनि गोथार थांखिखौ।
67
रंजानाया जोबोद दुष्टयै
बेयोदि खालामो थाथिखौ,
हांख्रायो दुखुखौ दान्दिसे
मोदैजोँ मेगनाव गाबनो लुबैयो।
68
गोजान अनजिमानि लुबैनाय
सौग्रावो सान्नायनि रुगुंआव,
बिरबायो गुसु मोदोमफ्रु बाराव
थाखोमा एब्रेयो गोरबोआव।
69
आथुरै समा बिरबायदोँ
हां मोनस'यै नागिरो खारफानो
थनथ्रनाय गोरबोआ
सिरि जाहाद
आख' फाख'यै हान्थियो।
70
गोरबोआव उसिना रंजानाय
मा जाखांदोँ मिनिनाय
फुंबिलिनि बारा बिलिरो
गोदान गोरबोआव गोदै खौरां।
71
गोसोखौ फोजावो दाखा जोमैया
बिरबाय बिरबाय आरो
गोग्लैदोँ आं लैथो फैसालियाव।
72
सिरियै आंङो गोबाव गोदोनानै
मिथिस'यै लैथोआव थब्ल'बाय,
हरखाब दै गुथालजोँ जाखांदोँ
मिनिस्लु मिनिना फेँफोना महराव।
73
सानबाय थानाय मिजिँआव मेँहाबो
हरखाब गुथाल्ला सेम जालाङो
लामायाव सुन रावबो गैया
हान्थिनो नायहरो हार्सिँङै गोख्रै।
74
गोसा सान्दुंआव देहाया लरहायो
खोलो खोलो बारा बरायो,
गोलोमदै हुगारै लामा हान्थियो
मेँनाय सोदोबा लासै रिँखाङो।
75
मोसानाय बिफां बिलाइखौ नायहरो
मेगन आलौज्रो नायहाबो,
गोरबोआव गोबां सानस्रिया बोहैयो
नागिरो थब्ल'नो गोगो लैथोआव।
76
मोसायो मेगननि लांगोनायाव
साननि सोरांआव
ब्ला ब्लि मोदानो,
नुहाबनाय आरोबाव मुहियो
गोरबोआव बबायै मिनिनाय।
77
बिरलाङो गोसोआ आंनि
गेलेनाय दाउसिननि दालाइयाव
मोसानाय बाज्ल' बाज्ल'यै,
आरोबाव मिनिस्लु बारनि मोसानाय
बिफांनि बिलाइ बाज्ल'नाय।
78
उखैनाय सोलेरनि गांनायखौ बुरखायो,
आरोबाव
साननायनि रुगुंखौ खाथियाव
गोरबोजोँ हास्थायो।
79
बिरनाय सानस्रिया मिनिदोँ
सौदावना दुफावलु जोमैयाव,
हांमानि दिखारा गाग्लोबो
गोथौ लैथोआ फोजावो।
80
मिनिनायनि देँखो रिँखाङो
सिरि सिरि मानोबा मिनियो,
रंजानाय मोनखाङो गोरबोआ
बाज्ल' बाज्ल' मानोबा गोसोआ।
81
खोमसिया साग्लोबनाय समाव
दङ आं सोरां मोनै एमाव,
हरखाब सिरि मोनो आं
रंजालु बमानि होख्रावनायाव।
82
खोमसि साग्लोबदोँ मेगनाव
आन्दो नुनो मोना मिथिँगाखौ,
नायहरो आं मेगन हुब्लेरना
दान्दिसे रंजानाय गोरबोआव
सिउ सिउ बिलिरो गुसु बारा।
83
उखुम मान्दालियाव बेमा
मानोबा मुहिनाय बोदोँ मेगनखौ,
आसि खौखाब हमना नायदोँ
रंजानाय मोन्दोँ गोरबोआ
मादि समायना सावगारि बेयोदि
गाखोलाय ओँखारलाय लुनाय जे।
84
साननायनि जेबो सिमा गैया
जेबो रुगुं गैया,
बिरबायो जोमै जोमै मिजिँआव
नागिरो मोनसे
जिउनि लुबैनायखौ।
85
मिथिँगानि जोबनो गैयै सोमोथाया
आंनि गोरबोआव बासा बोयो,
मेगनाव बे मुहिनाया
थांलाय फैलाय गेलेयो।
86
हाजोनि बोहैनाय निजोरा
गासोमनाय आथिँआव सुहाबो,
गोजोँ जोँख्लाबनाय गोगो महर
आंनि गोसोखौ फोजोनो।
87
रंजायो दान्दिसे गोरबोआ
सना माय बिदांनि मोसानाय,
हरखाब मेगनाव साग्लोबो
खोमसि फैसालिया बिरबोयो।
नायहरो हार्थखि मिनिस्लु
जोँनाय समायना अख्रांनि।
88
लामायाव रावबो गैया
सिरि सिरि स्राय,
हथाथ दान्दिसे गुसु बार
मोदोमाव सुहाबनाय बिलिरो।
89
गुसु सोलेराव आरोबाव गुसु
खोलो खोलो बारनि बिलिरनाय
आखायखौ बिखायाव बोजबो आं
गुसु आखायखौ दुंबुर खालामो।
90
सोनाब फैसालियाव लुंहे लांनाय
जोँमा जारौखौ नायहरो आं,
आंनि गोरबोआ हाथासि
दुलाराइ बुहुमा खोमसि साग्लोबनाय
थेवबो नागिरो गुसु बार।