जिख्लाबसे लाइजाम: 'रैसुमै'नो 761-790 Poem by Ronjoy Brahma

761
आं जेब्लाबो नोँखौनो सानो
बियो आंनिनो अराय गोरबोआव,
समा बारलांदोँ बेबादियैनो-
आंनि नोङो जिउआव लोगोसेनो।
762
आं मोन्दाङो नोङो फोरमायगोन
नोङो सानसे आंनो बुंगोन-
सैथो आंनि आजावना अन्नायखौ
बेसेबा गोबाव मोजां मोन्नाय।
763
मोजां मोन्नायखौ जायनो सायख'दोँ
आं नोँनि थाखाय सासे,
आंनि गोरबोआ नोँनि आखायाव जेब्लाबो
जेब्लासिम आं बे मुलुगाव।
764
माब्लाबा आं गोजोन मिनिस्लुयो
खुसियै बिखायाव नोँखौ बोजबनानै,
नोँ आरो आं
आंनि सोदोब बिहुंआव।
765
हार्सिँ आं बुहुमाव
नोँनि मिनिस्लुनायाव नङाब्ला
हार्सिँङै आं नोँखौ सान्नानै
नोँनि मुस्रि बिखायाव बोजबनानै।
766
मोजां मोन्नाय खन्थाइखौ सुजुयो
नोँनो आंनि जिउ होन्नानै-
रैसुमै जेब्ला आं उन्दैमोन
आंनो नोँनि सान्नाय नङामोन
नाथाय दिनै नोँनि अन्नाय गासै
सिरि सिरि आंदि नागिरो।
767
जेब्ला आंनो बुङो नोँखौ
मोजां मोनो बिखाजोँ,
नोङो मिथिया बेसे बियोदि-
मा इसे गोहो मोजां मोन्नाया
बेसे जाम्बा आंदि नोँखौ नागिरनाया।
768
जेबो जाहोन गैया
बोरै सोमजिनाय गोरबोनि रावआ?
जेब्लाबो नोँनि थाखाय
जेब्लाबो नोँनि गुसु अनहाबनाय।
769
नोँनो आंनि जिउ साजायनाय
मोजां मोन्नाय लोगोसे,
नोँ आंनि अरायनि
लोगोसे मुलुगाव आं जेसे दं।
770
जेरैबो गोमजोर मुलुगा
हार्सिँ आंखौ नायगोमोयै,
नोङो आंजोँ गोजानाव
सान्दोँ अब्लाबो लोगोआव।
771
निजोरा फुंखानि दैबादि
बेयो आंनि मैला जाया,
बोहैदोँ जेब्लाबो गुसु गोरबोआव
रैसुमै नोँनि सान्नाय गासै जिउआव।
772
नोँ आंनि जानो हागौ गोजानाव
नाथाय आंनि सान्नायनिदि
नङा माब्लाबाबोदि बाहेराव
रैसुमै जिउ नोँनि साया।
773
नोँखौ जेब्लाबो नागिरो
नोङोदि आंनि सान्नायाव सना-
गासै सम हां बाराव
नोँ आंनि।नोँ आंनि रैसुमै।
774
नोँखौ हास्थायो रैसुमै
नोँनो आंनि सान बुब्लिनि
मोजां मोनो जिउ सना आंनि।
775
जेब्लानो आं गोसो खाङो
मोन्दांथि गोरबोजोँ आं नुयो
मिनिसुलु लामायाव थाबायनाय
जारौ गुसुथि जोमग्रा लोगोसे।
776
मोनफ्रोम बुब्लियाव समायना
सानफ्रोमबो जेब्लाबो समाव
नोँ आंनि जेब्लाबो गोरबोआव
रैसुमै बहा बावनो नोँनि मुस्रिखौ?
778
खुदुम आंनि गोगो मोदैयाव
रंजाहो आंखौ सना खुसियाव,
नोँ जेब्लाबो आंनि सेर सेर,
जेब्लाबो आं नोँखौ नागिर नागिर-
रैसुमै सना नोँदि आंनि।
779
बेसेबा खोमसियाव,
सान्नाया थाङो नोँनि सोरांआव;
जेब्ला आं सिरि हार्सिँङै,
नोँनि समायनाया सोरां;
मिनिसुलु जारौ आंजोँ गेलेयो।
780
नोँ आंखौ मिनिहोयो
जेब्ला आं नोँखौ नुयो,
नोँ आंखौ सना साजायो
जेब्ला नोँ गावनो लाजियो।
781
आंनि गासैबो खोमसि फैयोब्ला
नोँ आंनो जिउ होयो,
नोँ आंनो रंजानाय होयो,
बेसेबा समायनायै आं सानहाबबा।
782
दा आं नोँखौनो सानो
जेब्लाबो सान आरो हराव,
नोँ आंनि जिउआव फैयो
आंखौ जेब्लाबो गोजोन हान्थियो।
783
नोँनि गोसोनि जोँथि मेगना
नुदोँ आंनि गोरबोआव?
बोजबना लादोँ अरायबो
रैसुमै सना आंदि नोँखौ।
784
नोँ आंनि अरायनि साजायनायब्ला
बोजब जाबाय आंगो
आंनि जिउआव,
रैसुमै मिथिया दा
- आंनि हास्थायनायाव
नोँनो आंनि जिउ लोगोनिब्ला।
785
रावबो दिनै मिथि मोना
नोँबोदि दाबो बुजि हाया,
नाथाय मादि बियो सिखावै-
बेयो आंनिल' जिउ सोरां लामायाव।
786
सिमांनिफ्रायबो बेयो नंखायसिन
नङा बेयो साजायनाय,
अखानिफ्राय गोजौसिन आंनि मोदैया
रैसुमै जिउ सना नोँ आंनि।
787
बे मोजां मोन्नाया जोबोद गोथौ
बेयोदि जोबोद गोजोँ,
नुदोँ दाबि आंनि थाखोमानाय
आबुं जिउ लाइमोनाव।
788
रैसुमै मादि लाजिसुलु
जारौ गुसुथि नोँनिया
बिखायाव बोजबनो हाबिला
नोँखौ सना दुंब्रुद गोरबोआव।
789
एसेबां नुबाय लामायाव
एसेबां रायदावबाय मोखांआव
बुङा अब्लाबो, थाखोमानाय बाथ्रा;
साजायनाय जिउनि मोनसे मिजिँ
थाखोमाबाय गोमो गोथां
समायना बेसेबा गावनि गोरबोआव।
790
सिमां सिमां गैया नंखाय
नाङा जिउनि खारलुं गोसोखौ
मिथिगौ दा आंनि बिखायाव
दं एब्रेना नोँनिनो मुं सोलेर।