जिख्लाबसे लाइजाम: 'रैसुमै'नो 791-812 Poem by Ronjoy Brahma

791
लामायाव नोँ मिनिसुलु
मोखांजोँ मोखां फंसे राव
बेसेबा गोदै नोँनि फिन
रैसुमै सना नोँ आंनि।
792
गान्नायजोँ थाबायनायाव
नुयो मेगना बेसेबा मुहिनायाव,
रैसुमै गोरबोआव गोजोन्नाय
बेसेबा नोँखौ आं नुनायाव।
793
बावनो बोरै आंदि
मेगननि मोदान्नाय बिलिरनायखौ
अ' बियो साया माया दं लोगोआव
गोमोरा बिरलाङा बारजोँ।
794
एसेबां खुसियाव फंसे रावआ
बोरै होयो नोँनि आंनो?
रैसुमै मासुमै जोबोद लाजिसुलु
बेयो दैमुदि बार गोदान बिलाइनि।
795
सुफुंगासे बारजोँ बिरखारै
नोँदि ददेरे; खानाय खफाया
गुफुं सोलेरनि, मिनिसुलु मोखांनि
समायसार होनाय इनायनो लाइमोना
हायना सारफावो लामा दथायाव आंखौ।
796
जेब्लाबो नोँ गाबो मोदैजोँ
आंनि गोरबोआबो दुखुजोँ,
नाथाय आंनो मिथिया
आं बुंनोबो हाया,
जेब्लाबो आंनि गोरबोआव
सोरनि थाखाय बे हास्थायनाय?
797
माब्लाबा होदोँ नोँनो मोजां मोननाय
बेयो थांना दं नोँनि गोरबोआव?
मोजां मोन आंखौ,
आद्रि दाखालाम नोङो
आरोबाव बेखौनो दं आङो नेना।
798
नोङो मोनगोन आंखौ नायहरब्ला
मोनसे जोँनाय मिनिस्लु मेगनाव,
मादि मोनसे बे बुब्लि-
सैथोयै गसंनाय, गोजोँ बिदिन्था।
799
नोँखौ नुनायनि सिगां
आं नोँखौ नागिराखैमोन?
एबा सोरखौबासो नागिरदोँमोन?
नाथाय बोदोँ नोँनि मिनिस्लुनायानो।
800
मोजां सान्नो होआ
थारैनो आं मिथिगौ
बिनि उन आरो सिगां,
बेल'नो नोँजोँ आंजोँ जेरावबो
मेगनजोँ मेगन लोगोआव।
801
जेब्ला सोरबाया जेब्लाबो थैयो
सुबुंफ्रा बुङो सोरजिनि,
नाथाय नोँ जेब्ला मिथिँगायाव
अब्ला सोरबा दं मुलुगाव
मोजां मोनो अब्ला सोरजिनिबो गोथौ।
802
बेयाव गोदै मोजां मोनहाबनाय
ओँखारबोयो जिउमानिफ्राय रंगिना
सिरि सिरि दैमुबादि,
गोदै अनहाबनाय निजोराया
बाग्लायबोयो आंनि गोरबोआव।
803
आंनि गोरबोआ गिदिर
गोफार सुबादि मुलुगाव
बेयो जेरैबादि गुबुननियाव गैया,
बेयो नोँनाव जखम खालामो
जेरै नोङो आंखौ बोजबो।
804
नोँनि अनगा थांना थानायखौ
स्रोब मानोबा बावलाङो,
गुबुन आरो सिमां नागिरा
नोँनि जिउआव बयनिबो आं
जानोसो नागिरो खन्थाइगिरि।
805
जोँ सानैजोँ सासे नङा
नाथाय नोँबो आंनि गोजान नङा
जाहोन मिथिया जे
मा फैयो जोँनि इयुनाव।
806
नोँ जेब्लाबो आंनिनो बिखायाव
जेब्ला नोँ सोरखौबा नागिरो
नोँनि सावगारिखौनो नोँ
आंनि बिखायाव नुयो,
जेराव आं लामा नायो।
807
सैथोयै जोखोम जानाय
आंनि सैसे बिखाया
सिंआव बेसे आं नोँखौ हास्थायो-
नोँबो मिथियो जुदि खोनासङो।
809
समा जेब्लाबो बिरो
नाथाय आंनि मोजां मोन्नाया-
नङा माब्लाबाबो थैया,
जोथोनै लाजादोँ बिखायाव
गोसोआव आंनि जिउजोँ
आंनि मोजां मोन्नाया।
810
हास्थायनाया समायना
बेयो रंगिना-संगिना सिमां
जिउनि मोनसे सायखं।
811
मोजां मोन्नाया निहोरबादि
नाथाय आंनि हाबिलाया थरथिँसे जोबा
हाबिला अरायबो मोजां मोनसे।
812
बुब्लिया समायनानिफ्राय समायनासिन
आंनि गोरबोआव मोजां मोननाय,
जिउआव मोन्दांथिया रंगिना
बुङाब्लाबो आं नोँनो फंसे।