मागोनिफ्राय बैसागु- I Poem by Ronjoy Brahma

(रमारि, थेफानि न'आव)
मागो बैसागु बोथोरब्लाथाय सान हर
माब्ला सोराङो,
माब्ला मोनायो,
मिथिनाय गैया।
जेराव मोनजायो बेवहानो थायो।
जेराव मोनलोङो बेवहानो गोदोयो।
सोरांस्लाब मोनै थेफानि सिलायाव दिनै
सोरला- लोरला फेग्लिनाय सोलेरा।
मेथाइ खनै खनै लावांआ हाबबोयो-
'गोरोन्थि जालांबाय आगै सब'लिन.....'
थेफानि फिसाजो थिख्रिया बागदावो
बियो थोरसि सुदोँ।
बियो लावांनि मोखां बुंहरो-
- हाब आमाया बेरे फुंजानि...
- लाबो जौआ लाबो लाबो
जौआ आंजोँ हाया।
सोरगिदिँ बेंखन्नाय खुवाया नै दासो
सिरि सिरि सोरनिबा होख्रावनायाव
खारखुमा लांनायबादि गोमालांबाय।
जोँमा जारौ सानजा फैसालि नुजाबोगौ-
गोजा जारौ मिनिस्लु मिनिस्लु।
लोरला फेग्लिनाय देहाखौ लानानै
साजायनाय सिला बेरेन्सियाव जिरायो लावां,
सोरगिदिँ खना-खनला नायहरो-
खेबसे गारमा हब्राना रिँहोयो गामि गंसे
'दमासि, दमासि, दमासि'
- मागो दमासिब्लाथाय बेबादिनो जायो
गासैबो हनै- अमासि;
गोरान मिथिँगाया, बिफां-लाइफां
दाउसिन दाउलाफ्रा बहाबा बिरलांदोँ,
दाउ खौओनिथ' रादाब गैया,
हनै हनै फालोसे दाउस्रि हाजि-
बिसोरो गोजा जाहाब सुमलि बिबाराव
गिदिँ गिदिँ मोसाबायदोँ।
लावांआ गोसो इसिँआव खन्थाइ आवरायो
लिरनाया बिनि हबि नङा
लिरनोबो रोङा?
फिसाजो, फिसाज्लाफोरखौ फोरोँनोबो रोङा
बबाव जौ?
बबाव बेदर?
गन्थं फोलावनाया बिनि सर'
लोगोसे रादाबा गन्थंआव फैब्ला
बिनि आथिँआबो उन नङा।
आगदा आगसि बादिलायगोन-
थेवबो मेँनाय गैया बिनि।
दुब्लियाव मोसौ खाना नै-
दासो सफैदोँ थेफाया,
थांनाय साननिफ्राय- मोनाबिलियाव
बारा जादोँ बेहा लोँनाया,
नै खर' सादोँ दाबो थिँ थिँ।
सिलायाव सफैयो थेफाया,
नुग्रोन नुग्रोन रायदावो लावांआ-
- हाबाब बैसागु बोथोर
बेबादिनो मागो बोथोर
खारखुमा नोँसोर अमासि अमासि,
नोँसिनि बाहागोखौ आं मोनलोँबानो जाबाय।
- थारला बारा जाथारदोँ मैयाना,
खर' सागासिनो थिँखाव थिँखाव,
हरनि गु रिँगायावसो सफैनायानो।
- बोसोराव खेबसे रंजानाय
मागो- बैसागुआव खेबसेल' मोसानायावनो
खारखुमा नोँसोर,
हाबसो हाबसो था न'आव।
- बे फाग्ला हंलायानो लाबोदोँ
गावहा बारा जाना लेँखारबोदोँ।
गुसु गोजांनाय लानानै
खाब आरो जग लोगोआव
मल मल मोदोमनाय जौ लाबोयो
लासै लासै सुमित्राया।
- हाब लावां, बेरे फुंजानि,
- जेबो नङा आब',
बोसोराव खेबसेल'सो,
गाज्रि जादोँ नामा बोसोराव खेबसेया?
- बेबादि नङा,
सम थानांगौ मानसिनाव
बेसे गुसु बोथोर बे
बेसेबा गुसु हर थांनाय मोनायाव
रोनाव बायनाय,
सोरमोन बेलाइ?
गावनि देहाखौ जोथोन गैयै
लोँबायबायनाय गुसु-गुसा हरथौहाब हरथौहाब
मोजां जादोँ बेयो?
सानाव रंजानांगौ- मोनाबिलिसिम
जेब्ला साना सोनाब फैसालियाव थाङो,
थिक समाव न'आव थानांगौ।
मागो- बैसागु होनबा बेबादि
हर सान फेनानै रोनावय नामा
लामा सामा उन्दुसोना थानाय नामा?
- दे आब' बेलाय बे,
- बेलाय बे नङाहाय लावां,
गावखौनो गाव सांग्रां जानांगौ।
रंजानांगौबो-
सानहाब्ला गलियाव मोसौ बोरमा
दुब्लियाव लायना खाफैनांगौ,
मानसिया रंजानानै, मानसिया हरफा सानफा
गारमा सिग्लाब सिग्लाब मोसानानै
दुब्लियाव हरफा गोजांनानै मोसौ बोरमाया थानांगौ नामा?
ओरैनोबाबो सावरि बादालि
सोरनिबा हाबा खेराय
मोसानाय रंजानाय, जानाय-लोँनाय
गोमाखायानो माथो नोँस्रा?
ग्रद ग्रद गोदावो जौ बिदैखौ
नायगोमोयो सुमित्राया,
बियो जोँ नायना बुङो-
- लानाय