नेपाली कविताः—मायाको तरंगहरु Poem by Tulsi Shrestha

नेपाली कविताः—मायाको तरंगहरु
तिम्रो दिलको हर धडकणमा
मैले आफ्नै हस्ताक्षर
कोरेको छु ।

तिम्रो दिलको मन मन्दिरमा
आफ्नो नामको दियो
बालेको छु ।

कैद गरिकन ती
प्रभातका सुनौला किरणहरु
उपहार म तिमीलाई दिनेछु ।

तिम्रो सौन्दर्यवाट परावर्तित
सु-भ प्रभातका किरणहरु
म चुम्न चाहन्छु ।

मेरो नजरको तृष्णा मेट्न
तिम्रो सौन्दर्यलाई, म
परेला भित्र कैद गर्न चाहन्छु ।

मेरो आगमनको सम्मानमा
तिम्रो नितम्ब चुम्ने कालो केस
हावा संगै फरफराए छ ।

मेरो मनले जप्ने
त्यो शासत्व शब्द नै
तिम्रो प्रेमको प्रतिध्वनि भएछ ।

लौ हेर प्रिय वन उपवनमा
तिम्रो मधु मुस्कानले
डढेलो लागेछ ।

शब्द मेरो कविताको, तिमी
त्यसैले तिमी मेरो
जीवनको अपरिहार्यता पनि ।

मेरो कविताको शब्द तिमी
अनि प्रियतम
अनुप्रासको मिठास पनि ।

मेरो आवाजको प्रतिध्वनि तिमी
मेरो गीतको संगीत पनि तिमी
छन्द र लयको उदगमस्थल पनि ।

निर्मल त्यो तिम्रो छविको
उपमा दिन, गर्छु म
रचना नव भाषाको
रचनाकार : - तुल्सी श्रेष्ठ