ପିଟାପଡାର ପରସନ Poem by Gajanan Mishra

ଜାନିଛ?
ପିଟାପଡାର ପରସନକେ!
ଜଦରବି ଜାନିଛ
କେନ୍ତା ଜାନିଛ?

ନେଇଁ କହେଁ
ହେଟା ଚୋରଟେ
ନେଇଁ କହେଁ
ଦଗାଦାରଟେ
ନେଇଁ କହେଁ
ଦିନଭର ବାଁକେଲଡେମେ
ପକଉଥିସି ଜାଲ
ଝୁରି କଁକଡା ମାଛ
ଧରସି କେତେ
ବିକସି କେତେ
ନେଇଁ ଜାନିପାରନ କିହେ!
ସମିଆ ପାଏଲେ
ଇ ବାରିର କାଁକେର
ସେ ବାରିର କରଲା କୁସେର
କୁକରାଚିମରା ଛେଲମେଢା
ଟଁଗିଆ ରଫା ତାର୍
ଜାହା ଜେନଟା ଜେନୁ ପାଏଲା
ନେଇକରି ଘରେ ଭରଲା
ନେଇସେ ହେନ୍ତା!

ଡଁଗରବୁଢା ସାଖି
କୁଲିହା କୁକୁର ମାକଡ ସାଖି
ସାଗୁନଗଛର ପତର ସତ୍ ସତ୍ କହେସି
ଡାଲ ଗଛ ଚୋରସବୁ ଠୋଲ ଇନ
ସଜଦେଖି ଲଗାବାରକାଜେ ଫାସି।
ପଚରନେଇଁ ପରସନ ବିସେଥି
ଜେନ ଜେନଟା ଜେନ୍ତା ପାରୁଛ
କରବାରଅଛେ ତ କର
କହେବାର ନେଇଁ ନ କିଛୁ
ଗୁନ୍ଦଲାଗୁପା ସବୁ ଇନ
ଆରୁ ହେତାର ଫାଏଦା ଉଠାବାରକାଜେ
ଘାଟ ଜଗିଥିସି ପରସନ।

ପରସନର ମା ବୁଆ ଭାଏ ବହେନ
ସଭେ ଅଛନ କି ନେଇଁ ଅଛନ
ହେସବୁ ପଚରାବାର ନେଇଁ ନ
ଅଛେ କାଣା କେନ୍ତା ହଉଛେ
ନିଘା କରି ନିଜରଠାନେ ଖୁଦ
ରହିଜାନଲେ ହେଟା ହେଲା ନ!

ତପୋବନ, ଟିଟିଲାଗଡ, ବଲାଙ୍ଗୀର
12/03/2020