ଏତାଲା, ଯାଉଛି ଦେବାକୁ ମୋ ବିରୁଦ୍ଧରେ ମୁଁ। Poem by Gajanan Mishra

ଏତାଲା, ଯାଉଛି ଦେବାକୁ
ମୋ ବିରୁଦ୍ଧରେ ମୁଁ।
ଆରୋପ- ରୋକଠୋକ କହୁଛି କଥା,
ଭୟ କରୁ ନି କାହାକୁ।

ଏତାଲା, ଯାଉଛି ଦେବାକୁ
ମୋ ବିରୁଦ୍ଧରେ ମୁଁ।
ଆରୋପ- ଲେଖୁଛି କବିତା
ଭାବରେ ପହଁରି, ଅନୁସରି
ଶବ୍ଦର ଡଙ୍ଗାକୁ, ଭାଷାର ନଈକୁ।

ଏତାଲା, ଯାଉଛି ଦେବାକୁ
ମୋ ବିରୁଦ୍ଧରେ ମୁଁ।
ଆରୋପ-ବୁଲୁଛି ବେଫିକର
ଲୋଭ ନ କରି ଘରଦ୍ୱାର
ବନ୍ଧୁ କୁଟୁମ୍ୱ ସରକାର।

କହୁଛି- ମୁଁ ମୋ ସରକାର,
ଉପରେ ସୂର୍ଯ୍ୟର ଆଲୁଅ,
ତଳେ ମାଟିର ଧୈର୍ଯ୍ୟ,
ଚାରିଆଡେ ମୋର
ପବନର ଶିଡି।

ଚଢୁଛି ମୁଁ ପୁଂଜି କରି
ପବନର ଶିଢିକୁ।
ଚଢୁଛି ନା ଓହ୍ଲାଉଛି
ପଚାରୁଛି ଯେବେ ଆକାଶ
କରିଛି ଅପେକ୍ଷା ନିଆଁ ପାଣିର ଉତ୍ତରକୁ।

କଳ୍ପନା ପାରୁ ନି କରି
କିଏ କେତେବେଳେ ଯାଉଛି ଚାଲି
ଶତ୍ରୁପଲକୁ କି ମିତ୍ରପକ୍ଷକୁ।
ତଥାପି ଆଗେଇଚାଲ,
ଅନେଇଛନ୍ତି ସଭିଏଁ ମୋ ଡାକରାକୁ।