चिता संगै बिलाउने यो जीवन Poem by Tulsi Shrestha

गजलः—चितासंगै बिलाउने यो जीवन
भौतिक देहसंग जल्ने शासत्व सत्य यो कस्तेा
आवरण भित्रको निरर्वश्त्र आडम्बर हो यस्तो ।

खरानी संग गाभिएको देह यो कस्तो
मृत्यु संग लाचार हुने अभिमान जस्तो ।

लाशसंगै सेलाउने यो माया कस्तो
चितासंग बल्ने वात्सल्य हो यस्तो ।

लाशसंग शुरु हुने रोदन यो कस्तो
खहरे खोलाको प्रतिरुप हो यस्तो ।

चितासंग बल्ने यो वेदना कस्तो
मृत्युभित्र लुकेको रहस्य जस्तो ।

क्षणभर मै विर्सिने यो नाता कस्तो
चिता र लाशको सम्बन्ध जस्तो ।

सोच कति जटिल छ, यो मानव जीवन यस्तो
मृत्यु पछि पलाउने यस्कोअस्तित्व कस्तो।

खरानी भै बिलाउने, हेर यो जीवन कति सस्तो
मोक्षको नाममा पुनः लुटिने, हेर यो जीवन कस्तो ।

पैसामा तौलिने धर्म र कर्मकाणड कस्तो
बालुवामा खन्याइएको पानीको अस्तित्व जस्तो ।

नैतिकताको परिवेशभित्र पलाउने दुराचार कस्तो
निश्चय नै त्यो, आदर्शको खेती गर्ने महादानव जस्तो ।

रचनाकारः—तुल्सी श्रेष्ठ
by Tulsi Shrestha
@copyright reserved