थुदो थांदिनि रजे Poem by Bahadur Basumatary

साना सोरां जाबाय रजे
थुदो थांदिनि,
नोँनि आंनि बै सोरांनि सिमांफोरजों
गेलेहैदिनि।
सोरांनि फुंबिलि बुब्लियाव
मुलुग दावगानि मुगायाव
नोंनि आंनि सिमांफोरा
सोमखे जालाङोब्ला
गोमालांगोन मोखथांफोरा।
दिनैनि नैजिसे जौथायनि लामायावबो
नोँनि आंनि गोरबोयाव
सुबुंथिनि नेरसोना लाथिख'ब्ला
गुबुन हादरनि गुबुनफोरबादि
आबुं गियानि बिर जायाब्ला
मुलुग दरबारनि मेगननि नोजोराव
गोजान नायख्लेँजालाङोब्ला
गोमालांगोन नोँनि आंनिनो सिनायथि।
बिनिखायनो,
थुदो थांदिनि रजे
गोसो गोरबो होसोमनानै
दावगालांदिनि।
हाजार जेँना जेँगोनाफोरखौ नेवसिनानै
नोँनि आंनि गोथार सिमांखौ
जाफुंहोहैदिनि।
फैगौ संसारखौ रंजानायजोँ बुंफबनाय
सोरगोबादि खालामहैदिनि।
थुदो थांदिनि रजे।