आंनि देरा Poem by Bahadur Basumatary

आंनि देराया बायला-जिला जानो हागौ
थेवबो नोँ दान्दिसे जिरायफै
हाव हाव सान्दुंनि गेजेरावबो साया मोनगोन
जोबनो गैयै गोजोननायखौ मोनगोन।

आंनि देराखौ जेबो गैयै लांदां नुनो हागौ
नाथाय सना रुफानि बाख्रिसो
जायखौ मोन्दाङोब्ला नोँ एंगारनाय नङा
आरो गासैखौबो बावगारलांगोन।

आंनि देराखौ अरगेंनि बासा नुनोहागौ
नाथाय बेयाव दैमुनि निजिरासो दं,
जायखौ मोनदाङोब्ला नोँ रंजाखांगोन
आरो थैस'-थांस' गोसोखौ बिखायाव लागोन।

आंनि देरायाव दावखा-सिला फैनोहागौ
नाथाय बेफोरबो दान्दिसेनिल'
जाय गोहोखौ नुब्लानो बिसोर गिखांगोन
आरो गासैखौबो नागारलांफिननांगोन।