ꆿꑆ Comments

ꀉꁌꆿꅥ。

ꀋꁧꆿꑆꃷ。

ꆿꑆꀋꃷꌦꂾ,ꄻꑳꂾꈠꄉ,ꑳꂾꍶꃀꒀꃀꌺꑌꌠꌺꇗꌐ;ꄻꑳꊂꈠꄉ,ꑳꊂꌧꃰꌧꅗꋍꁧꈬꐙꋍꁧꊂꈹ。

ꀄꂼꅔꏁꄩ,ꀋꁧꆿꑆꈪꈚꊾꈬꇬꀥꐺ,ꊿꉬꇮꆿꇁꀐꄸ,ꁡꇤꁡꇊꇓꁨꈁꐛꌠꑾꈯꃅꈯꌐ。ꀉꂿꀉꄂ,ꆿꅸꌩꏪꆸꈈꄉꋍꃢꌦꇈꄓꇁ。

ꆿꑆꀋꃷꌦꂾ,ꃅꑆꐛꋺ;ꊖꑆꐛꋺ;ꒉꑆꐛꋺ;ꃪꑆꐛꋺ;ꌍꑓꐛꄮꇬ,ꌍꑓꈴꄉꉠꉝꅉꈯꄿꀉꄂꂿꀋꉆ。ꂿꉆꇮꇬ,ꉢꍩꄌꆼꁠꈢꀕꂯ?

ꆿꑆꌌꇰꋒꊨꂿꄷꇈ,ꋑꃚꌩꏪꋌꌌꆅꏂꊌꁧꏦ;ꆿꑆꌌꇌꈻꏣꃢꂿꄷꇈ,ꉞꁍꃅꅪꂿꀋꇎꏦ;ꆿꑆꌌꁈꁧꈪꂿꄷꇈ,ꊿꇬꌊꄐꌠꀋꐥꏦ。

ꉢꆿꑆꂿꀋꋻ,ꆿꂿꀋꋻ。ꆿꌦꌩꄹꐛ,ꊿꌦꆿꅪꐛ,ꃰꊿꂒꇬ,ꆿꌦꑆꁬꃅꑴꇬ,ꀉꂿꅺꊪꅺꃰꏋꄹꏋꄉꉠꏯꀠ:ꀋꌦꃅꆿꀋꐛꇂꄷ,ꌺꂘꈍꏯꂘꀋꐚ,ꋌꂾ,ꑠꄮꇬꆿꑆꀋꁧꃷꇫꎭꀐꅊꇈ!

ꋋꄹꈎꀕꏅꄹꂰ,ꉪꏤꑱꈐꄯꊰꈈꇉꄩ,ꀉꁌꑭꐨꇬꁮꊊꀋꂿ,ꂿꃅꇬꑌꋍꃢꌦꑴꌦꑵꉬꏭꁮ,ꀄꂼꐛꅉꉫꑟꁈꀋꐥ!

——ꉠꉌꃀꈺꌋꀕꍇꌠ,ꉢꄌꌊꑌꂾꅉꏯꄯꊰꃴꍗꃴꆧꁏꈧꌠꀂꏽꑕꎍ,ꄯꊰꉀꀕꑌꀋꌋ,ꂷꋶꆈꀱꀕꇈꂷꋶꆈꀱꀕ,ꌋꐓꆺꄜꀕꇈꌋꐓꆺꄜꀕ!……
...
Read full text