HAIKU Poem by Gabriel Rosenstock

luaitear a ainm
agus siúd an crotal coille
ar fud na bhfud

dreacha
sa bhéilteach thine
is dual dóibh siúd athrú, leis

snag breac
ólann lán a ghoib
dá íomhá féin

bonnán ceo
beagán ar bheagán
an domhan ag dul as

margadh na míol in Valparaiso
clogad Gearmánach
is meirg air

ag scinneadh thar ghoirt na maidine
beireann ga gréine
ar mhún an ghiorria

ceobhrán na maidine
piocann colúr
ar aiseag an druncaera

an ghrian os cionn na Himáilithe
ólann mo mhiúil
as an nGainséis

maidin sheaca
nochtann spideog a brollach
don saol Fódlach

éigrit ina seasamh i murlach
éadaí á mbualadh
ar leaca

ag bun na Croise
iompaíonn seilide fuilteach
ina bhúda

gaotha ag éag
cosán tréigthe sléibhe
go dtí an seanséipéal