(Written at Andreashof near Litzmannstadt, July 1943)
Wee Jamie was a bonny chiel,
Wi' hair o' heather broon,
No bluer e'en had Glesga seen,
Since Glesga was a toon.
Wee Jamie's faither worked the boats,
Aboon the Broomielaw,
Way up and doon frae Campbelltoon,
An whiles he stayed ashore.
Wee Jamie's maw, sae guid an braw,
Was once a wild McLean,
Her Gaelic tongue wagged even on,
She couldna weel refrain.
Wee Jamie's lived in Garscube Road,
A hoose abin the stair,
And a' his life was one lang strife,
Gey oft he greeted sair.
Wee Jamie's uncle cam ane day,
Doon frae the Heilan line,
Wi' offer braw tae Jaimie's Maw,
For him tae watch the kine.
Wee Jaimie'll bide alang wi' me,
Till past next Glesga fair,
He'll hae his meat and aye a treat,
Forbye, I'll pay his fare.
Wee Jaimie went to work the farm,
That on the moor was built,
An' noo his breeks wi' peat bog reeks,
When he nae wears the kilt.
Wee Jamie noo we'll leave a while,
Tae mind his coos and things,
But he'll be back wi' a bit crack,
Just see what next month brings.
This poem has not been translated into any other language yet.
I would like to translate this poem