ସବୁ ସତ କି? Is All Truth? Poem by Gajanan Mishra

କେଉଁଠାରୁ ଆସିଛି ମୁଁ
ଯାଉଛି କେଉଁଆଡେ,
ରହିଛି କେଉଁଠି
କିଛି ଜଣା ନାହିଁ ମତେ।

ତୁମ ଶବଦ ଶୁଣୁଛି,
ଅଛି କଣ ସେଥିରେ
ଉପାୟ ନାଇଁ ଜାଣିବାର,
ଆଉ ଯାହା ଜାଣୁଛି କହୁଛି
ସେସବୁ ପ୍ରଥମ ନଈବଢିର
ବୁଦବୁଦ ଫେଣତୁଲ୍ୟ।

କାରଣ କଣ କିଏ ଆଉ କେମିତି,
ଜାଣୁ ଜାଣୁ ଯାଉଛି ସରି
ଏ ଫମ୍ପା ଦେହଗୋଟି ଯାହା
ସତ କି ସତ ନୁହଁ ଜାଣିବାର ଅଛି।

ଫେରକୁ ଫେର ଚାଲିଛି ନିଶ୍ୱାସ,
ଆଉ ଆରମ୍ଭ ସେଇଠୁ ସମୟ ଘଡି।

ଘଡିରୁ ପ୍ରହର, ପ୍ରହରରୁ ଦିନ ଆଉ ରାତି,
ସୂର୍ଯ୍ୟ ଚନ୍ଦ୍ରଙ୍କ କରାମତି,
ପୁଣି ବାର ପକ୍ଷ କୃଷ୍ଣ ଶୁକ୍ଳ
ମାସ ବର୍ଷ ତିଥି,
ନକ୍ଷତ୍ରଙ୍କ ଗତି।

ସବୁ ସତ କି?
ନା ମନକୁ ଭୁଲାଇ
ଗଣନାରେ ବ୍ୟସ୍ତ ବିଧି।
ଜନ୍ମମରଣ ନିୟତି।