ବାନର Monkey Poem by Gajanan Mishra

ବାନର
ଗଜାନନ ମିଶ୍ର

ମୁଁ ତ ପାହାଡ ପର୍ବତ ଜଙ୍ଗଲରେ,
ଗଛଡାଳରେ ରହିବା ଲୋକ,
ଯାଉଥିଲି କିଆଁ ସମୁଦ୍ରଆଡିକି?

ଗଲି ତ ଗଲି,
ସମୁଦ୍ରକୂଳର କୋଳିକି
କରୁଥିଲି କିଆଁ ଲୋଭ?

ଲୋଭ କଲି, ଖାଇଲି,
ଖାଇଲି ତ ଖାଇଲି,
କୁମ୍ଭୀରକୁ ଦେଉଥିଲି କିଆଁ?

ଦେଲି ତ ଦେଲି,
କୁମ୍ଭୀରଟାକୁ ବିଶ୍ୱାସ
କରି ତା ପିଠିରେ
ବସୁଥିଲି କିଆଁ?

ବସିକରି ସମୁଦ୍ର
ବୁଲିବି ବୋଲି ଭାବିଲି କିଆଁ?

କୁମ୍ଭୀର ଖାଉଥିବାବେଳେ
ବୋହି ଆସୁଥିବା ପାଣିକୁ
ଲୁହ ବୋଲି ଧରି ନେଇ
କାନ୍ଦୁଛି ବୋଲି ଭାବିଲି କିଆଁ?

ଭାବିଲି ତ ଭାବିଲି,
ପାରିଲି ନି ଜାଣି,
ମୋର କଲିଜା ଉପରେ
ପଡିଛି ସେଇ କୁମ୍ଭୀରର
ଗଦ୍ଦାରୀ ଆଖି ।

କିନ୍ତୁ ମୁଁ ଯେ ବାନର,
ମୋ ଇଚ୍ଛାସୁଖେ ଡାଳରୁ ଡାଳ
ବୁଲିବା ଲୋକ।
ନାହିଁ ମୋର ଲୋଭ,
ନାହିଁ ମୋର ମୋହ,
ସତ୍ୟଠାବ ଖାଲି ମୋର
ଏକମାତ୍ର ଲକ୍ଷ୍ୟ।