Muroora Wezuva Poem by Shelton Chiuswa

Hona uko kumakomo ndiro rodzokera muna amai varo.
Vaenzi vemiti tigu tigu vakananga kumapako
Izwai runyararo wauya nechinguva chazorora mwenga wesikati.

Mwedzi yodzimika chaedza murwendo rwechimhandara Munaku.
Munaku woye uyo chigagaigwa zifa romukaka.
Panotsikwa panosiya mutimhimira, ko iro ganda rovasikana rinenge richihwinya kunge nhumbu yechitaita.

Honazwe kana ouya achiti ga ga ga ndiye tsindi mimhano.
Ini tasa neyemudzo yake uyo chimhandara.
Iwo miromo kusvibira sehute dzaChivandire.

Nyasikana huya tirangane,
Ngatisata hwembira chimhandara chinopedza chinopfumbudza ivhu unoenda chiripo-ripo
Ngatiende pamusasa mugomo reshindi,
Nyenyedzi dzichivhenekera ruwanano rwangu kunewe.
Usandokwidza Nyamatikiki Gushungo vakarindira muhombakombe yeruvanze rwavo vanokumedza ndakashaiwa wokuita Rure-rure panotunga mwedzi.


Chiuuya kaMuroora tirangane,
Chiuya tisasane paye mubani raMapiye ndikurezve usiko huno.
Ndinoshuwira kuzotaura newe nyasikana, asi chivimbiso changu ndicharamba ndiri gwenya rwenzendo dzako kusvika waenda kuMazuvandadzoka