Nannie Nicolson Poem by Alexander Anderson

Oh, Jenny, she is fair an' braw,
An' Daisy fu' o' lovin' wiles;
Then Mary has a broo o' snaw,
An' lips an' cheeks just made for smiles.
I lo'e the three wi' a' my will,
For roun' my heart their spells are thrown;
But there's anither dearer still,
My bonnie Nannie Nicolson!


I like to look on Effie's face,
Where spring an' simmer wed their beams;
An' Annie sweet in stately grace,
She moves through a' my wauken dreams.
I lo'e the five, though weel I ken
That I can only wed wi' one.
O, tell me where it a' will en',
My bonnie Nannie Nicolson!


The sheep may wan'er where they like,
Or at dyke-sides lie doon an' dee;
My faithfu' collie, honest tyke,
He won'ers what's gane wrang wi' me.
I've lost mysel' amang them a',
I wish this weary life were done;
O, come to me, an' set me free,
My bonnie Nannie Nicolson!