NOZINDABA Poem by Albert Nyathi

Nozindaba
Thathawese
Umlomo ongahlalwa yimpukane
Undondabo
Nxa ungaqambanga amanga uyagula mngani wami
Nxa ungahlebanga ubuthongo abubuyi
Hawu Makhelwane mngane wami
Kanti uyalunywa na
Ungahla emzini wakho
Wethele abantwabakho inganekwane
Hawu uvuka lapha ulale lapha
Awuswelakali yonkindawo
Ukhona yonkindawo
Awusileli
Aweqiwa zindaba
Kanti awukwazi ukuthi abantu bakhuluma ngawe
yonkindawana
Kanti awukwazi ukuthi abantu kabasakulaleli
Awukwazi ukuthi abantu sebekwenza uhlanya
Awukwazi ukuthi awusahlonitshwa kulindawo
Awukwazi ukuthi abantu sebekwenza undondabo
Uthathekile, imota leyana leyana leyana
Utsho ukuthi awukwazi wena ukuthi usuyindaba egudwini
Sebevukisana ngawe batshonisane ngawe makhelwane
Hawu mngane wami


Hawu Nozindaba mngane wami
Tshiyana lezindaba
Ungukasaleli weni
Ezinkonzweni ukhona uzidlisa satshanyana kubafundisi
Mngane wami
Kwabathethelayo ukhona
Nguwe usithwala mayika
Kanti pho uyini, ungaphi
Haa sengiyabona manje
Ngiyabona ulunwabu wena mngane wami
Tshiyana lakho

Tshiyana lokuba ngumbaxambili
Emihlanganweni uma labaphathi
Tshiyana lekhwapha lenduna
Usekhwapheni lenduna wena