Pyar Main Khone Do Poem by Sumit Ojha

Paana bahut kuch chahta hoon magar
Bas aaj khud ko kahin khone do,
Karne ko batein hai bahut magar,
Bas aaj mujhe chup hone do,
Jhinjhod diya hai zindagi ne aaj itna,
Ye toofan shaant to hone do,
Apne hi jeevan ki raahon mein kaante,
Apne hi haathon fir bone do,
Fir se bachpan jeena hai mujhko,
Koi mere woh toote khilone do,
Toote hue khwabon ko
sametoon to kaise,

Mujhe naye kuch sapne salone do,
Pyar to khud se bahut kiya hai,
Aj khud se nafrat bhi hone do,
Insaan tha shayad, ye kya ban gaya,
Kuch der iska ehsaas to hone do,
Sapne dekhne hain fir se mujhe,
Kuch der ke liye bas sone do,
Jeena main bhi chahta hoon shayad,
Aaj magar mujhe rone do!