।। कागद ।। Poem by Rajeev Deshpande

कागद कागद कागदाची ताकद
जीवन प्रवासात सांगाती कागद
जन्मा येता दाखल्याचा कागद
नोकरीचा कागद चाकरीचा कागद
धंद्याचा कागद वांध्याचा कागद
अर्जाचा कागद कर्जाचा कागद
नगदीचा कागद उधारीचा कागद
कामाचा कागद दामाचा कागद
फायद्याचा कागद वायद्याचा कागद
वहीचा कागद सहीचा कागद
शेतीचा कागद जातीचा कागद
कागदी घोडे कचेरीतले कागद
जपलेले जीवापाड दुर्मीळ कागद
आज मथळा उद्या रद्दीचा कागद
आजन्म बाळगा पसाभर कागद
सापडतो शेवटी याच कागदात
आयुष्याच्या हिशोबाचा कागद
सोडता जग दाखल्याचा कागद
फिरून पुन्हा वारसाचा कागद
कागदाचा लगदा लगद्याचे खत
खतातून झाड झाडातून कागद!
~ राजीव नि. देशपांडे