Salig Ug Padayon Igsoon Poem by cosheila bihag

Ang tawo adunay pangandoy nga gustong kab-uton sa kinabuhi
Adunay panahon ang gihuptang panglantaw maoy giya sa paglihok adlaw-adlaw
Nga bisan daw sama sa kalisod sa tanod
Misakripisyo kini pagsulod sa nihit sa baba sa dagom

Kauban sa pangandoy adunay tawo nga may gipangita
Nga usahay dili sigurado kun unsa ug asa kini makaplag kung unsa ang gusto sa kasing kasing
Nga usahay mahinuktukan nganong nabuhat kadto nga maoy hinungdan sa paghisugamak niadtong kapalaran
Ug mahisayran na lang nga way pulos ang kahago
Kahago nga gigahin apan wala makita ang kagustuhan.

Nganong in-ani man?
Pangutana nga mibuka sa baba kun pakyas daw ang tanan
Usahay bug-at na
Nga maoy rason sa pagdagayday sa uwan
Kauban sa bato nga daw mihampak sama sa dalugdog nga mabatian
Ug kauban sa kahait sa liti nga mitugpa sa punuan sa kalubihan.

Samtang ang bagyo gapadayon pa gihapon
Ang tawo wa nakabsan sa paglaom
Kay ang haring adlaw mosilang sa silangan
Ug panason ang baha nga daw samad nga miuga pinaagi sa tambal gikan sa tambalanan.

Pagkamisteryo sa kinabuhi
Nga usahay ang tubag nga gipangita dili pa gihapon mahikaplagan
Ang tawo gapadayon bisan ang tubag naa na sa atubangan
Kay ang gustong tubag wala pa daw mituang.

Kun ang kahilom sa huna huna ug hiyas sa pag-andam sa nahitabo buot untang huptan sa katawhan
Aron ang grasya nga dugay rang gipangita dali ra untang makit-an
Ug ang tawo matudloan sa pagdawat sa kamatuoran.

Igsoon dili tanang gusto atong maangkon
Hunumdumi nga ang Amahan adunay giandam
Bisan sa wa pa ta matawo niining kalibutan
Kung may problema o bug-at nga gihuptan
Ayaw kahadlok o pag-atubili pagsulti Kaniya ang tanan
Sama lang kita sa bata nga nagkinahanglan ug ginikanan
Ginikanan nga maoy maminaw sa tagsa tagsa tang gikinahanglan.

Ayaw pag-inusara kay may kauban ka
Ang Hari nga tag-iya sa kinabuhi
Gamita ang kalig-on nga gigasa NIya kanimo
Aron ikaw magmalumpuson sa tanang lihok ug sa mga pangandoy mo.