Ubusuku Poem by Sibongiseni sbohnga

Ngihleli kuso lesi sithumbanjana,
Ngimamel' imizwa nomzwangedwa,
Ngaphakath' ekujuleni komzimba wami,
Kukapaka ngemithambo yonk' ekimi.

Ngizw' elimnand' elimtot' ilizwi,
Limemeza ngephimb' elipholile lomzwilili,
Libiz' elam' igama "Sbohnga...Sboh...
Ngokukhul' ukungangabazi ngelentokazi.

Intokaz' enhle emhlophe kuhle kweqhwa,
Intokaz' enguNobusuku wakwaNokuhlwa,
Ezothile nemnene ngobuhl' obunzulu,
Ingibizela kuy' uNobuthong' ongaliwa.

Nguye uNobuthong' ongibizela kobunzulu,
Kobunzulu nemfudumalo kwelamaphupho,
Laph' okungumzwangedwa kunqotshiwe khona,
Amandla kuwo aseshabalele aphilile.

Kwelaphupho konke kuhle okwamadlelo
Ngizohlala ngiphumule ngethabe...
Ngize ngilandwe nguy' oNokusa ngokusa,
UNokusa ehamba naye Nokukhanya omuhle,
Bayobe bephelezelwe yinkosazane uNolanga.

Bayobe bengiholela kuye umfowethu,
Ongumfowethu ngothando nokuthula,
Angithi nguye phela engibabele ukumbona,
Ngempokophelo kuyothi kusa ngiyobe fikile kuMhlomunye.