हरगेजेरनि मुगासे सिमां Poem by Didwmsha Basumatary

हरगेजेरनि मुगासे सिमाङाव
समाइना गलाब बिबार
नुखुमादोंमोन आं।
बबेबा अरननि ।

आवबा मेगननि फानदाइसुलि सिमां
रोमैदु खबामफोरा बोजों बिरलांखो
निजोम हस्रि हस्रि-
हरगेजेरआव मैहुर खालामबायग्रा
सांग्रेमायाबोसो खिनथा रोङा ।

फानफेवालिनि दैबाना नुथाइयाबोथ'
मुगासे सिमां
हा फिसा हौवा (दावनि) नि रोनाव बायनायावबो
जोहोलावफ्रा जोनोम लाफिनाखै ।

सोम सोम दाहा गाबनि जिरिनाय निजोराया
जोनोम लायो
खुद्रिसुला दिखार गोनां लैथोमा
बेनि रुगुङावनोथ'
हरगेजेरनि मुगासे सिमां!

बे सिमाङा मोगथां मुलुगनि
आनलेद साइखंब्लाबो
बियो मोगथां मुलुगनि
फानजामुथि रनसाइग्रा नङा
बिखौ हारसिं रोनावनो हो
मानोना;
आंदि मोगथांनिसो राजखुंग्रि! ! !

रोमै रोजाबलांनाय फानफेवालिनि खबामआव
दाहा गाबनि खनथाइ रेबो
हा फिसा हौवानि गोरबो ईंखङा ।